Համացանցում տարածվել է կադր ԲՀԿ առաջնորդ Գագիկ Ծառուկյանի համաժողովից, որի երկրորդ պլանում օգտատերերն արձանագրել են մի ուշագրավ պատկեր: Պատկերում ԲՀԿ անդամներից կամ համակիրներից մեկն է, որն, ի դեպ, մասնակցել է կուսակցության նաեւ այլ միջոցառումների, օրինակ ոչ իշխանական ուժերի երիտթեւերի հանդիպմանը ԲՀԿ գրասենյակում:
Այդ ներկայացուցիչը վերցված է կարմիր շրջանակի մեջ: Այդ երիտասարդը 2013 թվականին Րաֆֆի Հովհաննիսյանի Բարեւի շարժման ուսանողական ակտիվիստների դեմ կիրառվող «ախալքալակցիների զորքի» ներկայացուցիչ էր: Հիշեցնենք, որ այդ ժամանակ ուսանողները անցնում էին բուհերով եւ ընդդեմ նախագահի ընտրության կեղծիքների պահանջում էին միանալ դասադուլին:
Նախագահի ընտրությանը հաղթել էր Սերժ Սարգսյանը, իսկ ԲՀԿ ներկայացուցիչ այդ ընտրությանը չկար՝ Ծառուկյանը հրաժարվել էր մասնակցել: Դասադուլի կոչ անող ուսանողների հանդեպ ֆիզիկական եւ հոգեբանական բռնություն էր կիրառվում, որի ակտիվ մասնակից էին դարձրել «ախալքալակցիների զորքին»: Այդ արտահայտության հեղինակը Պետհամալսարանի ռեկտորի տխրահռչակ օգնական Գեւորգ Մելքոնյանն էր:
Եվ ահա, Բարեւի շարժմանն աջակցող ուսանողների հանդեպ ֆիզիկական եւ հոգեբանական բռնության «զորքի» մասնիկներից մեկը արձանագրվել է Գագիկ Ծառուկյանի համաժողովի մասնակիցների շարքում, որոնք պետք է փրկեն երկիրը կործանումից:
Կարդացեք նաև
Հրապարակումն ամբողջությամբ՝ սկզբնաղբյուր կայքում
