«Նոր միջանցքում լսեցի, որ Ծառուկյանը երբ օգտագործեց արտահերթ նախագահական ընտրություններ արտահայտությունը, վալիդոլի գները դեղատներում թռել են, «պամպերսների» էլ դեֆիցիտ է առաջացել»,- այսօր Գագիկ Ծառուկյանի հրավիրած ոչ իշխանական ուժերի խորհրդաժողովին իր ելույթում ասաց «Պոլիտէկոնոմիա» հետազոտական ինստիտուտի տնօրեն Անդրանիկ Թեւանյանը:
Խոսելով սահմանադրական փոփոխությունների մասին՝ նա նշեց, որ դրանք խորհրդային,ոչ թե խորհրդարանական համակարգի են բերելու. «Ինչքան էլ դեմագոգները պնդեն, թե իշխանությունը բարեփոխում է առաջարկում, եկեք օգնենք, մենք գիտենք, որ սահմանադրական փոփոխություններն արվում են մեկ մարդու համար: Հայաստանում մեկ մարդու շահը վեր է այլ մադկանց շահերից: Համաժողովրդական շարժման միջոցով պետք է նախ ստիպել վիժեցնել Սահմանադրական փոփոխությունները, հետո անցնել իշխանափոխությանը: Այլ տեսակետներ ունեցողները թող մասնակցեն Գալիպոլիի ճակատամարտերին նվիրված միջոցառմանը»:
Հռիփսիմե ՋԵԲԵՋՅԱՆ
