Երեկ «Առավոտին» հայտնի դարձավ, որ Վերահսկիչ պալատի նախագահ Իշխան Զաքարյանը, պաշտոնական պատվիրակության կազմում, գտնվում է ԼՂՀ-ում:
ՀՀԿ խմբակցության ղեկավար Վահրամ Բաղդասարյանը մեզ հետ զրույցում ասաց, որ վարչապետն այդ մասին համապատասխան գրություն է ուղարկել խորհրդարան եւ ընդդիմադիրներն էլ տեղեկացվել են:
«Որեւէ նամակ, որեւէ այդպիսի հայտարարություն չի կարող վեր լինել ԱԺ կանոնակարգից: Այնտեղ չկա նախատեսված, որ հանկարծ եթե ինչ -որ նամակ է ընթերցվում, կանոնակարգի այդ պահանջը չի գործում»,- Aravot.am-ի հարցին`ընդդիմադիր պատգամավորները տեղյա՞կ էին վարչապետի գրությունից, պատասխանեց ՀՅԴ խմբակցության ղեկավար Արմեն Ռուստամյանը:
Արմեն Ռուստամյան
Նա նաեւ հավելեց, որ որեւէ բան չէր տուժի ու սարսափելի բան տեղի չէր ունենա, եթե քանիցս հետաձգված քննարկումը ևս մեկ անգամ հետաձգվեր, մինչեւ Իշխան Զաքարյանը ֆիզիկապես ներկա գտնվեր: «Եթե կանոնակարգը խախտում ենք, այդ ամենը դառնում է նորմ: Դժբախտաբար, շատ ենք տեսնում կանոնակարգի խախտումներ»,- հավելեց ընդդիմադիր պատգամավորը:
Կարդացեք նաև
Համատեղ հայտարարությամբ, հիշեցնենք, խորհրդարանական խմբակցությունները պահանջում էին, որ հաշվետվությունը ևս մեկ անգամ քննարկվի:
Aravot.am-ն Արմեն Ռուստամյանից հետաքրքրվեց` քաղաքական մեծամասնությունից որեւէ արձագանք եղե՞լ է: «Առայժմ ես չեմ լսել: Դուք էլ լսած կլինեիք»,- պատասխանեց Արմեն Ռուստամյանը:
Նելլի ԳՐԻԳՈՐՅԱՆ
