Լուրեր հայտնվեցին, թե Հայաստանում ու Արցախում հեղաշրջում իրականացնելու նպատակով Հայաստան են ժամանել «Արեւմտյան Հայաստանի Ազգային ժողով» կոչվող կառույցի անդամները՝ տարբեր երկրներից:
Պարզվեց նաեւ, որ Բերձորում ծեծի ենթարկված Անուշավան Շահնազարյանը ռոստովաբնակ է, հիշյալ կասկածելի կազմակերպության անդամներից մեկը:
Ի՞նչ կառույցի մասին է խոսքը, ովքե՞ր են կանգնած սրա թիկունքում: Ասենք, որ հիշյալ կազմակերպության ղեկավարը նույնքան կասկածելի մի անձ է՝ Թիարի անունով: Նա Հայաստանում ներկայանում է իբրեւ ֆրանսահայ Արմենակ Աբրահամյան անուն-ազգանվամբ: Ավելին՝ իրեն հայտարարում է իբրեւ Արցախյան ազատամարտի ակտիվ մասնակից:
Սակայն Արցախյան ազատամարտի մասնակիցներից եւ ոչ մեկն իրականում այս «կենդանի լեգենդի» մասին ոչինչ չգիտի, մեզ չհաջողվեց գտնել գեթ մի ազատամարտիկի, որը կճանաչեր զենքը ձեռքին Արցախում մարտնչած Արմենակին:
Կարդացեք նաև
Փոխարենը, Արմենակ-Թիարիին նկարագրելիս շատերը զգուշորեն ակնարկում են՝ նա մի անձնավորություն է, որը հայտնի է քրդերի ու թուրքերի, անգամ սիրիական ընդդիմադիրների հետ մութ կապերով, մարդ, որը փորձում է արեւմտահայերի անունից ստեղծված կառույցը եւս իր նույնքան մութ ու վտանգավոր նպատակներին ծառայեցնել:
«Նշված կազմակերպության մասին լսել եմ, բայց իրենց հետ ոչ մի առնչություն չունեմ»,- մեզ հետ զրույցում ասաց Արեւմտահայոց ազգային համագումար կազմակերպության անդամ, ԲՀԿ-ական պատգամավոր ԱՐԱԳԱԾ ԱԽՈՅԱՆԸ: «Դա մի վիրտուալ, ինձ համար անհասկանալի կառույց է, որը ստեղծել է ինչ-որ կառավարություն, ունեն, այսպես կոչված, նախագահ ու վարչապետ», մի խոսքով՝ ինքնակոչների հավաքատեղի:
Ժամանակին Արեւմտյան Հայաստանի հայերի Ազգային ժողով կոչվող կազմակերպության վտանգավորության մասին մեզ հետ զրույցում հետաքրքիր կարծիք է հայտնել ԱՐԱ ՊԱՊՅԱՆԸ՝ չբացառելով, որ նմանների թիկունքում կարող է կանգնած լինել թուրքական կառավարությունը։ Նա ասել էր՝ խամաճիկային այդ կազմակերպությանը կարող են նաեւ օգտագործել սեփական շահերի համար, որպես քարոզչական գործիք՝ մեր նպատակներից շեղելու համար:
Մի տեղեկատվություն եւս. սույն պարոնը՝ Արմենակ Աբրահամյանը, Հայաստանում հավատացնում է, թե իր կազմակերպությունը ՄԱԿ-ում մեծ դերակատարություն ունեցող կառույց է։
Արա Պապյանը հերքեց նաեւ սույն փաստը՝ ակնհայտ դարձնելով Արմենակ-Թիարիի հերթական կեղծիքը: «Այդ կազմակերպությունը ՄԱԿ-ում չի գործում: Նա ուղղակի գրանցվել է որպես հասարակական կազմակերպություն ու անունը դրել Արեւմտյան Հայաստանի Ազգային խորհուրդ: Բայց սա չի նշանակում ՄԱԿ-ում գրանցված լինել, չի նշանակում, որ ՄԱԿ-ը ճանաչում է նրանց»:
Արմինե ՍԻՄՈՆՅԱՆ
Հոդվածն ամբողջությամբ՝ «Հայոց աշխարհ» թերթի այսօրվա համարում
