«Յուրաքանչյուր երկիր ինքնիշխան որոշում է, թե ինչ ամսաթվով պետք է կազմակերպի այս կամ այն հիշատակման արարողությունը: Յուրաքանչյուր երկիր ինքն է որոշում որ երկրին հրավիրել իր կազմակերպած միջոցառմանը: Միակ բանը, որ կարող եմ ասել՝ այն է, որ կարող եմ հստակ ասել, թե պարզից էլ պարզ է, որ Ֆրանսուա Օլանդը ապրիլի 24-ին լինելու է Հայաստանում»,-այսօր «Մեդիա կենտրոնում» հրավիրված ասուլիսում հայտարարեց Հայաստանում Ֆրանսիայի դեսպան Ժան-Ֆրանսուա Շարպանտիեին:
Նա նշեց, որ 2015-ի օրակարգում երեք կարեւոր հարցեր կան՝ Հայոց ցեղասպանության 100-րդ տարելից, Ռիգայում «Արեւելյան գործընկերության» գագաթաժողով եւ Երեւանում Ֆրանկոֆոնիայի միջազգային կազմակերպության անդամ երկրների ԱԳ նախարարների հանդիպում: Գագաթաժողովի մասին դեսպանն ասաց. «Կփորձենք կոնկրետացնել Հայաստանի-ԵՄ հարաբերությունների զարգացման առաջնահերթ ուղղությունները»:
Նա անդրադարձ կատարեց նաև Ֆրանսիայում` Փարիզում տեղի ունեցած ահաբեկչությանը ու նշեց. «Թիրախ ընտրված էր ոչ միայն Ֆրանսիան, այլև իրական էր նաև կարծիք հայտնելու, ազատ արտահայտվելու ազատությունները, որոնք մեզ համար շատուշատ ավելի թանկ են»:
Պարոն դեսպանն իր ասուլիսին խոսեց նաև հայ-ֆրանսիական գործարար, առևտրային հարաբերությունների մասին: Նա նշեց, որ մայիսին ՀՀ-ում կանցկացվի ֆրանսիական գործարարության շաբաթ: Հարցին` արդյոք ԵՏՄ անդամակցությունը չի՞ խոչընդոտի այդ հարաբերություններին, պարոն դեսպանն ասաց. «Չեմ կարծում, որ անդամակցությունը ազդեցություն թողած լինի ԵՄ-Հայաստան հարաբերությունների վրա: Առևտրային տեսանկյունից ԵՏՄ անդամակցությամբ ՀՀ ստանձնած պարտավորությունները շատ ավելին են, բայց, այդուհանդերձ, այդ պարտավորություններով հանդերձ կան ճյուղեր, որտեղ հնարավոր է ԵՄ-ՀՀ մակարդակով ծավալել համագործակցություն: Բայց, օրինակ, էներգետիկայի ոլորտը ԵՏՄ ստանձնած պարտավորությունների ցանկում է և երևի թե այս ոլորտում հնարավորությունները համագործակցելու այդքան էլ շատ չլինեն»:
Կարդացեք նաև
Դառնալով «Քարֆուր» ցանցի բացմանը, պարոն դեսպանը պարզաբանեց. «Առաջին «Քարֆուր» սուպերմարկետը կբացվի մարտի սկզբներին: Ինչ վերաբերում է ապրանքատեսականուն, ապա այդ մասին Քարֆուրի պատասխանատուներն ավելի հստակ կասեն, սակայն նրանք հակված են աշխատել տեղացի արտադրողների հետ»:
ՀՀ-ԵՄ նոր փաստաթղթի ստորագրման հավանականության մասին, պարոն դեսպանն ասաց. «Դեռ սահմանված չէ, թե ինչ անվանում կունենա այդ փաստաթուղթը, փորձագետների մակարդակով բազում հանդիպումներ են տեղի ունենում թե՛ Երևանում, թե՛ Բրյուսելում»:
Տաթև ՀԱՐՈՒԹՅՈՒՆՅԱՆ
