Երեկ, հայտարարությունների ժամին, ՕԵԿ-ական պատգամավորները հայտարարել են, որ շրջանառության մեջ են դնում օրենքի նախագիծ, որով նախատեսվում է տարադրամով տրված վարկերի վերակառուցում:
Այսօր, խորհրդարանում հրավիրած մամուլի ասուլիսում, ՕԵԿ խմբակցության քարտուղար Մհեր Շահգելդյանը մի քանի հիմնավորումներ բերեց առ այն, թե ինչի՞ է պետք այժմ կարգավորել հարցը: Նա հիշեց, որ այս պահին բանկերը դրամով վարկեր չեն տրամադրում: Դրանից բխող առաջին վտանգը Մհեր Շահգելդյանը համարում է դրամի արժեզրկումը:
Ըստ ՕԵԿ-ական պատգամավորի, դրամով եւ եվրոյով ստացած վարկերի արդյունքում մեր քաղաքացիները կորցնում են իրենց գումարների 40 տոկոսը:
Նա նաեւ պաշտոնական տվյալներ բերեց, որոնք փաստում են, որ Հայաստան մտնող տրանսֆերտները, ֆինանսական շուկայի վերջին զարգացումների արդյունքում, 15-20 տոկոսով պակասել են: ՕԵԿ-ական պատգամավորի համոզմամբ, այս թիվն իրականում ավելի մեծ է:
Կարդացեք նաև
Հաջորդ վտանգը, որը տեսնում են ՕԵԿ-ում, այն է, որ մարդիկ սնանկանում են ու չեն կարողանում վճարել հիպոթեկային վարկերը: Ըստ բանախոսի, դա կվտանգի անշարժ գույքի ողջ շուկան, քանզի երբ մարդիկ չկարողանան վճարումներ կատարել, պետք է փորձեն հնարավորինս մատչելի գներով վաճառել ձեռք բերած բնակարանները:
Նելլի ԳՐԻԳՈՐՅԱՆ
