Երեկ ՀՀ վարչապետ Հովիկ Աբրահամյանն անսպասելիորեն գնացել է Ազգային ժողով՝ քննարկելու Շրջանառության հարկի մասին ՀՀ նոր օրենքը:
«Առավոտի» թղթակցի հետ զրույցում «Փոքր ձեռներեցությամբ զբաղվողների հայկական միության» նախագահ Ստեփան Ասլանյանն ասաց՝ ինչպես որ 3 օր առաջ վարչապետի մոտ եղած ժամանակ պայմանավորվել են, այնպես էլ Հովիկ Աբրահամյանը խոստումը պահել է եւ երեկ կրկին հանդիպել ձեռներեցներին. «Կարեւոր խնդիրն այն էր, որ հասկանայինք՝ այս անգամ էլ 5 ամսով հետաձգելը արդյոք չի՞ արժանանա նույն բախտին, ինչպես եղավ հոկտեմբերին»:
Հանդիպմանը ներկա են եղել նաեւ ֆինանսների երկու փոխնախարարները: Ըստ Ս. Ասլանյանի՝ վարչապետի հետ հանդիպման արդյունքում որոշվել է համապարփակ քննարկումներ կազմակերպել շահագրգիռ անձանց հետ՝ ըստ առեւտրի ոլորտների, եւ մի ընդհանուր լուծում գտնել, որը ձեռնտու կլինի ե՛ւ ձեռներեցներին, ե՛ւ պետությանը, ե՛ւ իշխանությանը. «Մի քանի օրից կառավարությանը կներկայացնենք մեր առաջարկները»:
Միության նախագահի խոսքերով՝ իրենք մեծ հույսեր ունեն, որ Հովիկ Աբրահամյանը ձեռներեցների համար մի դրական լուծում կգտնի. «Վարչապետի դիրքից, պահվածքից, մոտեցումից ընկալելի է դառնում, որ մարդը ցանկություն ունի հարցը լուծելու: Մենք էլ կկանգնենք նրա կողքին՝ փորձելով հարցը լուծել»:
«Առավոտ» օրաթերթ
03.02.2015
