«Ես դժգոհ եմ: Չկա հստակ նպատակ, չկա օրակարգ»,- այսօր ԱԺ հայտարարությունների ժամին Հայոց Ցեղասպանության 100-ամյակի հետ կապված այսպիսի գնահատական տվեց Հրանտ Բագրատյանը:
Նա ասաց, որ մի բան է, երբ մենք ուզում ենք Ցեղասպանությունը ճանաչել, մեկ այլ բան է, երբ աշխարհին դիմում ենք, թե հոգացեք ոչ միայն ցեղասպանության հարցը, այլ մեր պատմական դարդը: Հրանտ Բագրատյանի խոսքերով՝ 3 հարց է դրված
1.Ցեղապանության ճանաչում 2.Հատուցում 3.Տարածքների խնդիր:
Ըստ նրա՝ «Երբ դնում եք տարածքի հարց, վերջ, ցեղասպանության հարց կարող եք չդնել: Ես զարմանում եմ, որ մեր պետական այրերը դա չեն հասկանում»:
Կարդացեք նաև
Հրանտ Բագրատյանը հայտարարեց. «Ցեղասպանության հռչակագիրն ինձ համար անընդունելի է եւ անիմաստ: Նախ, մենք, որպես խորհրդարան, մեր Ցեղասպանությունը ճանաչելո՞ւ ենք, թե՞ չէ: Ամբողջ աշխարհին ասում ենք՝ ճանաչեք: Հույների, ասորիների ցեղասպանություններից հետո չե՞քն կարող մեր հարցը դնել: Կարծում եմ, ԱԺ-ն հատ առ հատ Ցեղասպանության ճանաչման հարցով պետք է դիմի 193 երկրների խորհրդարաններին: Բայց միայն Ցեղասպանության ճանաչման հարցով, դա է պետական հարցը, ոչ թե ուրիշ օրակարգ: Մենք պիտի մի հարց առաջ տանենք, հետո հաջորդ հարցը առաջ բերենք: Ամբողջ հեռուստատեսությունը լցված է հայտարարություններով, թե մենք ամեն ինչ ուզում ենք Թուրքիայից: Ամեն ինչ ուզել նշանակում է ոչ մի բան էլ չենք ուզում: Ամեն ինչ ուզելն անհնարին է: Մի՞թե վերեւում չկա մեկը, որը անալիզ կանի այս հարցերը»:
Նա քննադատեց, որ իշխանություններն այս տարիների ընթացքում չեն առաջադրել Ցեղասպանության ճանաչման հարցը, դրա համար էլ ընդամենը 18 երկիր է ճանաչել. «Սպասում էինք, որ գոնե մի 30-40 երկիր կճանաչի: Եթե մի բան էլ ուզում ենք, խոսում ենք ընդհանուր, խոսում ենք 200 հազար քմ-ի մասին, որտեղ այսօր 15 մլն մուսուլման է ապրում»:
Հռիփսիմե ՋԵԲԵՋՅԱՆ
