Իջեւան քաղաքի բնակիչ, 1966թ. ծնված Սվետլանա Բեգլարյանին մեղադրանք է առաջադրվել այն բանի համար, որ նա հանդիսանալով պաշտոնատար անձ, 2012-2013թթ.-ին աշխատելով որպես Իջեւան քաղաքային համայնքի «Իջեւանի միջնակարգ երաժշտական դպրոց» ՓԲԸ տնօրեն, անձնական շահերից ելնելով` 2004թ. հունիսի 30-ին կազմել է անհայտ կեղծ փաստաթուղթ հանդիսացող, Էդգար Ամիրյանի անունով «Իջեւանի միջնակարգ երաժշտական դպրոց» ՓԲԸ-ի միջնակարգ մասնագիտական կրթության վերաբերյալ թիվ 1063 վկայականն այն մասին, որ վերջինս իբր 2001թ. ընդունվել է այդ երաժշտական դպրոցի շվիի բաժին եւ 2004թ. ավարտել է լրիվ դասընթացը:
Իջեւանի բնակիչ, 1981թ. ծնված Է. Ամիրյանին մեղադրանք է առաջադրվել այն բանի համար,որ նա 2004թ. հունիսի 30-ին ստանալով վերոհիշյալ կեղծ վկայականը, այն օգտագործել է որպես հիմք եւ որպես շվիի կատարող 2004թ. աշխատանքի է ընդունվել Իջեւանի երաժշտական դպրոցում: Ըստ առաջադրված մեղադրանքի` բայցի այդ, Է. Ամիրյանը 2013թ. հուլիսի 29-ին աշխատանքից ազատվելու վերաբերյալ 2013թ. հունիսի 26-ի հրամանը Տավուշի մարզի ընդհանուր իրավասության դատարանում վիճարկման ընթացքում որպես ապացույց է ներկայացրել իրավունք վերապահող վերահիշյալ կեղծ վկայականը, որի հիման վրա վերականգնվել է նախկին աշխատանքում:
Ըստ «Դատալեքս» դատական տեղեկատվական համակարգի` Է. Ամիրյանին 2 դրվագով մեղադրանք է առաջադրվել ՀՀ քրեական օրենսգրքի 325 հոդվածի 1-ին մասով, Ս. Բեգլարյանին` ՀՀ քրեական օրենսգրքի 314 հոդվածով: Երկուսի նկատմամբ էլ, որպես խափանման միջոց, կիրառվել է չհեռանալու մասին ստորագրությունը: Իջեւանի քաղաքապետարանից տեղեկացանք, որ Ս. Բեգլարյանն ազատված է Իջեւանի երաժշտական դպրոցի տնօրենի պաշտոնից, Է.Ամիրյանը ներկայումս աշխատում է այդ երաժշտական դպրոցում: Սույն քրեական գործով դատավարությունն այսօր մեկնարկել է Տավուշի մարզի առաջին ատյանի դատարանի Իջեւանի նստավայրում:
Ոսկան ՍԱՐԳՍՅԱՆ
