Թուրքագետ Ռուբեն Մելքոնյանը փետրվարի 3-ին «Հայելի» մամուլի ակումբում լրագրողների հետ հանդիպման ընթացքում հայտարարեց, որ վերջին 20 տարիների ընթացքում թուրքական քարոզչական եւ քաղաքական մեքենաները գտնվում են լուրջ ճգնաժամի մեջ: Ըստ նրա՝ նաեւ սպառված են բոլոր դրույթները, որոնք նրանք կարող էին առաջ քաշել:
«Երբ որ նայում ենք Էրդողանի իշխանության տարիներին, ապա տեսնում ենք, որ փչացած սկավառակի նման անընդհատ նույն մտքերը կրկնվում են եւ ըստ էության քաղաքական մեքենայի սին լինելը ապացուցվում է նրանով, որ 13 տարիների ընթացքում Էրդողանի իշխանությունը որեւէ մի նոր գաղափար չի կարողացել մտցնել իր քաղաքական հռետորաբանության մեջ, շարունակ՝ պատմաբանների հանձնաժողով, արխիվներ, որոնք թուրք պատմաբաններն են փաստում՝ փակ են եւ անիմաստ տոների ստեղծում եւ դրա վրա միջազգային հանրության ուշադրության հրավիրում»,- ասաց նա:
Անդրադառնալով Դարդանելի ճակատամարտին՝ թուրքագետի խոսքերով՝ փաստ է, որ Դարդանելի ճակատամարտը կապ չունի ապրիլի 24-ի հետ եւ միշտ տոնվել է մարտի 18-ին եւ դրա ապացույցն այն է, որ Ստամբուլում գտնվող համալսարաններից մեկի անվանումը մարտի 18-ի Դարդանելի անվան համալսարան է:
Ամի ՉԻՉԱԿՅԱՆ
