«Շրջանառության հարկի մասին» ՀՀ օրենքի պարտադիր փաստաթղթավորման պահանջի կասեցման մասին հարցի քննարկման ժամանակ այսօր ԱԺ-ում խմբակցության տեսակետը ներկայացնելիս Ռուբեն Հակոբյանը խոսեց Հայաստանի հրեշների՝ «մոնստրների» մասին:
Ռուբեն Հակոբյանը նշեց, որ ունենք 10-15 մենաշնորհատերեր, որոնք դուրս են օրենքի դաշտից. «Նրանք հիմնականում ներկրողներն են, որ անում են այն, ինչ ուզում են: Նրանց գլխավոր հովանավորը բարձրագույն իշխանությունն է: Եթե նկատի ունենանք, որ ներկրումը Հայաստանում 4 անգամ ավելի է, քան արտահանումը, կհասկանանք, որ մենք մեռնող տնտեսության մասին ենք խոսում: Այսօր նրանք փակում են մեր թթվածինը: ՓՄՁ-ները գնում են գրենական պիտույքներ, ներքնաշորեր, երեխաների համար հագուստ այդ նույն մոնոպոլիստներից:
Հիմա մենք ասում ենք, որ եկեք այդ օլիգարխների՝ մենաշնորհատերերի դեմ պայքարենք: Եկեք պայքարենք ժողովրդի մեջ կերպավորված այդ մոնստրների դեմ: Հեղինե Բիշարյանը ելույթ է ունենում, ասում է՝ կան դրանք, բռնեք, ասում եք՝ անունները տվեք, բռնենք: Լավ, ծիծաղելի չի՞: Դուք չգիտե՞ք ովքեր են դրանք: Եկեք միասին գնանք Գավառի, Տավուշի ամենավերջին գյուղերում կեսգիշերին մարդկանց արթնացնենք, ասենք՝ ովքե՞ր են այդ մոնստրները, նրանք անգիր, շուտասելուկի նման կասեն ովքեր են նրանք: Բա այդքան մենք կառույցներ ունենք հարկատուների հաշվին, որոնք պիտի ունենան դա: Ինչի՞ եք նրանց պահում, նրանք չգիտե՞ն: Չէ, դուխները չի հերիքում, որովհետեւ քաղաքական ղեկավարության կողմից են դրանք երաշխավորված: Ի՞նչ եք դերասանություն անում ստեղ»:
Ռուբեն Հակոբյանը վստահեցրեց, որ երբ ՀՀԿ-ականներն ասում են, թե ստվերի դեմ են պայքարում, սուտ են ասում. «Ես չեմ ուզում, որ մեր հասարակության մեջ գործարար աշխարհն ընկալվի որպես հրեշ, բոբո: Հասարակությանը նրանց այդպես է մատուցվում: Լավ օրից չի, որ գործարարները գալիս ու պատգամավոր են դառնում: Դառնում են, որ մանդատով պաշտպանեն իրենց բիզնեսը: Ովքեր չեն մտել խորհրդարան, հետագայում դարձել են կինոռեժիսորներ կամ չգիտեմ որտեղ են հայտնվել: Սա է մեր իրականությունը, սա է մեր մշակույթը: Հիմա եկել ասում եք, թե ուզում եք պայքարել ստվերի դեմ: Լավ, էլի, ժողովուրդ, եկեք հարգենք մեզ, մեր մտավոր կարողությունները: Եկեք հասկանանք, որ այդպես չի»:
Կարդացեք նաև
ՀՅԴ-ի տեսակետը ներկայացնելիս Արծվիկ Մինասյանն էլ ասաց, որ եթե սա բարեփոխում է, չի կարող ցավոտ լինել. «Բարին չի կարող ցավագին լինել, որ ասում եք՝ ցավագին է: Մեր առաջ դնում եք բոբոներ, որ հետո խաղը չի ստացվում, ասում եք՝ այդ բոբոն էր պատճառը»:
Արծվիկ Մինասյանն ասաց, որ ՀՅԴ-ն կողմ է քվեարկելու հետաձգմանը, բայց լուծումներ է առաջարկում:
Հռիփսիմե ՋԵԲԵՋՅԱՆ
