«Շատերը կարծում են, թե Ցեղասպանության 100-ամյա տարելիցից հետո Հայաստանում և Սփյուռքում մարելու է պայքարը: Ովքեր հույս ունեն, թե 2015-ից հետո այլևս չեն զգալու Հայոց ցեղասպանության ճանաչմանն ուղղված հայության ճնշումը, չարաչար սխալվում են: Սա թյուր հաշվարկ է: 100-ամյակը առիթ է հայության նոր վերելքի ու համախմբման համար»,- այսօր լրագրողների հետ հանդիպման ժամանակ այսպիսի համոզմունք հայտնեց ՀՀ նախագահի աշխատակազմի ղեկավար, Հայոց ցեղասպանության 100-րդ տարելիցի միջոցառումները համակարգող Վիգեն Սարգսյանը՝ վստահեցնելով, որ Հայոց ցեղասպանության ճանաչման ու դատապարտման միջազգային պայքարն ապրիլի 24-ով չի ավարտվի:
Իսկ մինչև ապրիլի 24-ն ընկած ժամանակահատվածում նախատեսված միջոցառումները կմեկնարկեն մարտի 18-20-ը Երևանում կայանալիք «Արարատի ստորոտին» խորագրով միջազգային մեդիա համաժողովով, որին կմասնակցեն տարածաշրջանային և միջազգային լրատվամիջոցների ներկայացուցիչներ:
«Սա միջազգային լրագրողներին նախապատրաստելու լավ հնարավորություն է՝ ապրիլի 22-24-ը մեր կողմից անցկացվող միջոցառումները պատշաճ լուսաբանելու և դրանց շուրջ միջազգային արձագանք ապահովելու համար»,- նկատեց Վ. Սարգսյանը:
Նրա տեղեկացմամբ՝ ապրիլի 22-23-ը Երևանում կանցկացվի «Ընդդեմ ցեղասպանության հանցագործության» թեմայով հասարակական-քաղաքական համաժողովը, որը հարթակ կապահովի այդ թեմայով քննարկումների համար:
Կարդացեք նաև
Ապրիլի 23-ին Մայր աթոռ սուրբ Էջմիածնում տեղի կունենա Հայոց ցեղասպանության նահատակների և մարտիրոսների սրբադասման արարողությունը, որից հետո Երևանում՝ Հանրապետության հրապարակում, կկայանա աշխարհահռչակ System of a Down ռոք խմբի համերգը: «Խմբի տղաները երկար տարիներ պայքար են մղում Հայոց ցեղասպանության ճանաչման և դատապարտման համար: Հանձնաժողովը որոշեց, որ ճիշտ կլինի, եթե 100-ամյա տարելիցի օրը հայության պահանջն արվեստի միջոցով հնչեցնեն հենց այս խմբի տղաները, որոնք, ի դեպ, երևանյան համերգից առաջ հանդես կգան միջազգային համերգաշարով (Լոնդոն, Ամստերդամ, Բրյուսել, Մոսկվա և այլն): Հայոց ցեղասպանության 100-րդ տարելիցին նվիրված համերգաշարը կանցկացվի «Արթնացնե՛նք հոգիները» (Wake up the souls) խորագրով»,- նշեց Վ. Սարգսյանը:
Ապրիլի 23-ին տեղի կունենա նաև ավանդական ջահերով երթը, որը կազմակերպում է ՀՅԴ երիտասարդական թևը:
Ապրիլի 24-ին Ծիծեռնակաբերդի բարձունքում տեղի կունենա Հայոց ցեղասպանության զոհերի ոգեկոչման արարողությունը՝ արտասահմանյան պատվիրակությունների մասնակցությամբ: Նույն օրը կկայանա նաև «Վերածնունդ» խորագրով դասական երաժշտության համերգը, որին կմասնակցեն Հայոց ցեղասպանությունը ճանաչած պետությունների երաժիշտներ:
Սիրանուշ ՀԱՅՐԱՊԵՏՅԱՆ
