«2015-ը ինտեգրացիոն գործընթացների տեսակետից կլինի բավականին հարուստ եւ հետաքրքիր տարի»,- հունվարի 30-ին, «Փաստարկ» մամուլի ակումբում լրագրողների հետ հանդիպման ընթացքում ասաց «Եվրոպական ինտեգրացիա» հասարակական կազմակերպության նախագահ Կարեն Բեքարյանը:
Նա նշեց, որ Եվրասիական տնտեսական միության (ԵՏՄ) համատեքստում կարեւորում է երկու հարց. առաջինը՝ պետությունը պետք է գործառույթ ստանձնի հանրությանը, բիզնես կառույցներին ԵՏՄ-ի ընձեռած հնարավորությունները բացատրելու համար, իսկ երկրորդը՝ պետությունը պետք է հստակեցնի Հայաստանի քայլերն ու գործողությունները, որոնք ԵՏՄ մյուս անդամներին օբյեկտիվորեն ցույց են տալիս Հայաստանի դերը եւ կարեւորությունը այդ միությունում:
Անդրադառնալով Եվրամիությանը՝ Կարեն Բեքարյանը համոզմունք հայտնեց, որ եվրոպական ուղղության ներքո Հայաստանը անելիքներ եւ հնարավորություններ ունի. «Մենք պետք է փաստաթղթի անվանումը մտովի չկարեւորենք: Կարեւորն այն է, որ մենք Եվրամիության հետ հնարավոր բոլոր ուղղություններով եւ ոլորտներով ապահովենք իրավապայմանագրային դաշտը եւ ունենանք համագործակցության ձեւաչափ, որը որեւէ կերպ պակաս չլինի Արեւելյան գործընկերության մյուս երկրներից»:
Նա համարում է, որ պետք է ընդգրկված լինեն նաեւ տնտեսական ոլորտի որոշ դրույթներ, ըստ նրա, Հայաստանի Հանրապետությունը ունի նախաձեռնողականության հնարավորություններ, որոնք դեռ կարող է կիրառել. «Դա կլինի երկկողմ ձեւաչափի ներքո՝ Եվրամիություն-Հայաստան, Արեւելյան գործընկերության ներքո, ինչու ոչ, կարող են բավականին հետաքրքիր նախագծեր լինեն հարեւանության ձեւաչափի ներքո: Հայաստանն ունի շատ հետաքրքիր իրավիճակ. Մենք արաբական պետությունների հետ ունենք ուրույն կապեր եւ ընդհանուր անցյալ ԽՍՀՄ պետությունների հետ, եւ այդ մեծ շրջանակում կամրջող դեր ուրիշ ոչ մի երկիր չունի: Հիմա դա պետք է օգտագործել»:
Կարդացեք նաև
Ամի ՉԻՉԱԿՅԱՆ
