Օրերս ԵԽԽՎ-ում հայկական պատվիրակության ձեռնպահ քվեարկությունը ռուս պատվիրակներին ձայնի իրավունքից զրկելու հարցի քվեարկության ժամանակ տարաբնույթ մեկնաբանությունների տեղիք է տվել: Այսօր լրագրողների հետ զրույցում ՀՀԿ պատգամավոր, ԱԺ արտաքին հարաբերությունների հանձնաժողովի նախագահ Արտակ Զաքարյանը, հարցին՝ ԵԽԽՎ-ում մեր պատվիրակության քվեարկությունն արդեն ինքնուրույն, ՌԴ-ից անկախության դրսեւորո՞ւմ է Հայաստանի համար: Նա պատասխանեց. «Երբ որ ՄԱԿ-ում քվեարկում էինք Ղրիմի բանաձեւի վերաբերյալ, մենք դա բացատրեցինք մեր շահերով: Մենք չքվեարկեցինք՝ ի աջակցություն ՌԴ-ի: Առաջին հերթին մեր շահերն են, որովհետեւ մենք 25 տարի ի վեր պայքարում ենք ինքնորոշման իրավունքի իրացման համար: Երբ որ ինչ-որ մի պարագայում քվեարկում ենք կողմ կամ դեմ, դա չի նշանակում, որ ՀՀ-ՌԴ հարաբերություններում ինչ-որ մի բան փոխվել է: ՌԴ-ի հետ մեր հարաբերությունները մնում են ջերմ, դաշնակցային, ռազմավարական հարաբերություններ եւ խորանալու, առաջ գնալու շատ մեծ ներուժ ունեն: Այս պարագայում եւս մեր պատվիրակությունը քվեարկել է՝ իր շահերից ելնելով: Սա չի կարելի բնորոշել, որպես ՌԴ պատվիրակության դեմ քվեարկություն»:
Մեր հարցին՝ չե՞ն պատժի մեզ սրա համար, սրա հետեւանքները մենք կմարսե՞նք, թե՞ չենք մարսի՝ Արտակ Զաքարյանը պատասխանեց. «Հետեւանքները մարսելու խնդիր գոյություն չունի, որովհետեւ Հայաստանի Հանրապետությունը սուվերեն, իրավահավասար պետություն է եւ առաջնորդվում է իր շահերով»:
Հռիփսիմե ՋԵԲԵՋՅԱՆ
