Երկուշաբթի օրը մեկնարկելիք քառօրյայի առաջին աշխատանքային օրը եռյակը`ԲՀԿ, ՀԱԿ, «Ժառանգություն», ժամը 18.00-ին արտահերթ նիստ կհրավիրի: Նիստում նախատեսվում է քննարկել «Շրջանառության հարկի մասին» օրենքի կասեցումը, մինչ այդ, նաեւ ԱԺ նախագահի մոտ խորհրդակցություններ կլինեն: Այս մասին եռյակի նիստի ավարտից հետո լրագրողների հետ զրույցում հայտարարեց «Ժառանգություն» խմբակցության ղեկավար Ռուբեն Հակոբյանը:
Նաեւ հայտարարություն հնչեց, որ եռյակի ուժերը կողմ են ու աջակցում են մեր քաղաքացիներին, որոնք պահանջում են այդ օրենքի կասեցում: Իսկ թե ի՞նչ են պատրաստվում անել հետո` կհայտարարվի հավելյալ, արտահերթ նիստի արդյունքներից կախված:
«Մեր խնդրանքն է, որ ցուցարարները արտահերթի ժամանակ լինեն Բաղրամյան փողոցում»,- ընդգծեց Ռուբեն Հակոբյանը`հավելելով, որ եռյակն իրապես ցանկություն ունի հարցը կոնսենսուսով լուծելու համար, քանի որ պատգամավորի խոսքով, փոքր և միջին բիզնեսը արդեն մտնում է Կարմիր գիրք. «Մարդիկ արդեն նստացույց են հայտարարում, իսկ ոմանք հայտարարում են, որ սա քաղաքական շահարկում է: Էս ի՞նչ համառություն է, որ չեն գիտակցում խնդիրը: Այս մարդկանց պահանջի մեջ առողջ բան կա, նրանք ուզում են ապրել այս պետության մեջ»:
«Իշխանափոխության պահանջը միշտ եղել է մեր օրակարգում»,- ասաց բանախոսը`պատասխանելով քաղաքական ակտիվ գարնանը վերաբերվող լրագրողների տարբեր հարցերին:
Կարդացեք նաև
Այսօրվա նիստում եռյակի ուժերը համաձայնության են եկել և առաջարկելու են ԱԺ-ում Գյումրու ողբերգության վերաբերյալ փակ լսումներ անցկացնել: «Պետք է մասնակցի արտգործնախարարը, գլխավոր դատախազը, արտաքին գործերի նախարարը: Մենք առաջարկում ենք, որ լսումները տեղի ունենան ուրբաթ օրը»,- նշեց Ռ. Հակոբյանն ու հավելեց` ունեն հարցեր, որոնք պատասխաններ են պահանջում, իսկ իրենք չեն ցանկանում, որ այդ ողբերգությունը շոուի վերածվի:
Այլ մանրամասները`տեսանյութում
Նելլի ԳՐԻԳՈՐՅԱՆ
