Մոտ կես ժամ առաջ ավարտվեց վարչապետի եւ տնտեսվարողների հանդիպումը: Մեզ հետ զրույցում առեւտրականների ներկայացուցիչներն ասացին, որ վարչապետը նրանց հայտնել է, որ երկուշաբթի հարցը կքննարկեն եւ լուծումներ կգտնեն:
Վարչապետի հետ հանդիպմանը լրագրողներին թույլատրվեց մասնակցել առաջին 5 րոպեն, որի ընթացքում ՀՀ վարչապետ Հովիկ Աբրահամյանը դիմելով բողոքի ակցիայի մասնակիցներից կազմված խմբի անդամներին ասաց. «Մենք ուզում ենք, որ դուք հանգիստ աշխատեք, ձեր ընտանիքները պահեք»:
Վարչապետը հորդորեց խոսել այնպես, որ մեկը մյուսի խնդիրները հասկանան:
Վարչապետի մեկնաբանությունները առավել մանրամասն տեսանյութում`
Կարդացեք նաև
Վարչապետը վստահեցրեց, որ ինքը հենց առաջին օրն է ցանկություն հայտնել «կառուցողական քննարկում անցկացնելու», բայց տնտեսվարողները հրաժարվել են` ասելով, որ վարչապետը իջնի ակցիայի մասնակիցների մոտ: Վարչապետի խոսքերով` «Հա էլի իջնեի, բայց ճիշտ էր, որ ձեր ներկայացուցիչները գային ու միասին քննարկեինք խնդիրը: Մենք հո ձեր թշնամին չենք, մենք հակառակը, ուզում ենք, որ ամեն բան լավ լինի»:
ՓՄՁ-ի շահերի պաշտպան Ստեփան Ասլանյանը վարչապետին ներկայացրեց «Շրջանառության հարկի մասին» օրենքի բացերը` վստահեցնելով, որ գործարարները իրեն դժգոհություն են հայտնել, որ խոշորը ոչ մի կերպ փաստաթուղթ չի տալիս, ուստի իրենք հայտնվում են անելանելի դրության մեջ:
Լուսինե ԲՈՒԴԱՂՅԱՆ
