Թուրքիային ցեղասպանություն իրագործելու մեջ մեղադրելն առանց դատավարության հանցանքի մեջ դատապարտելու ձև է, հայտնել է Թուրքիայի նախագահ Ռեջեփ Թայիփ Էրդողանը, բայց նշել, որ Անկարան պատրաստ է «վճարել իր սխալների համար», եթե «անկախ պատմաբանների խորհուրդը» եզրակացություն տա, որ «1915թ. դեպքերի» մեջ Թուրքիայի մեղավորությունը կա: Փոխանցում է «Հուրիեթ»-ը:
«Մենք պարտավոր չենք ընդունել, որ, այսպես կոչված, Հայոց ցեղասպանությունը կազմակերպված է եղել, – ասել է Էրդողանը «TRT Haber»-ին հեռուստակայանին հունվարի 29-ին տված հարցազրույցում, – մենք ասում ենք. «Եթե դուք այս հարցի հանդեպ անկեղծ եք, եկեք թողնենք այն պատմաբաններին, թող պատմաբանները ուսումնասիրեն այս հարցը, եկեք բացենք արխիվները»:
Նրա պնդմամբ, Թուրքիան արդեն բացել է արխիվները և խնդրի հետ կապված մեկ միլիոնից ավելի փաստաթուղթ բացահայտել. «Եթե Հայաստանը նույնպես ունի արխիվներ, նրանք պետք է բացեն: Եթե երրորդ երկրներն ունեն արխիվներ, նրանք էլ պետք է նույնն անեն: Թող նրանք ուսումնասիրեն և իրենց եզրակացությունը տան մեզ: Դրանից հետո քաղաքական գործիչներով նստենք սեղանի շուրջ», – առաջարկել է Էրդողանը՝ հավաստիացնելով, որ եթե պարզվի իրենք հանցանք են գործել, ապա «Թուրքիան կընդունի այն և կձեռնարկի պահանջված քայլերը»:
Ավելի վաղ Էրդողանը հայտարարել էր, որ իրենք պետք է անեն ամեն ինչ, որպեսզի դիմադրեն Հայոց ցեղասպանության ճանաչման արշավին, իսկ 2014թ. ապրիլի 24-ին ընդառաջ արված հայտարարության մեջ ցավակցություն էր հայտնել «1915թ. դեպքերի» արդյունքում զոհված հայերի ժառանգներին:
Կարդացեք նաև
Պատրաստեց Հովհաննես ԻՇԽԱՆՅԱՆԸ
