«Եվրոպական ինտեգրացում» հասարակական կազմակերպության նախագահ Կարեն Բեքարյանը հունվարի 30-ին «Փաստարկ» մամուլի ակումբում լրագրողների հետ հանդիպման ընթացքում նշեց, որ հունվարի 29-ին տեղի ունեցած պետական հանձնաժողովի նիստը հստակեցումներ մտցրեց կատարվող աշխատանքների մեջ:
«Համահայկական հռչակագիրը ոչ միայն ամրագրեց տարվա կտրվածքը, այլ հենց 100-ամյակի հանգրվանից հետո սպասվող օրակարգը, գործողություններն ու մոտեցումները: Պատահական չէ, որ հռչակագրում կա նաեւ անդրադարձ ապագա սերունդներին, սա մեզ տալիս է մտածելու տեղիք, փաստում է, որ խնդիրը 100-ամյակի կտրվածքով չի ավարտվում, այլ մենք դիտարկելու ենք դա»,- ասաց նա:
Պարոն Բեքարյանը անդրադարձավ Համահայկական հռչակագրի չորս հենասյուներին. «Հիշողություն՝ իր ողջ ծավալով, երախտագիտություն, որի ներքո թե՛ ցեղասպանությունը ճանաչած պետություններն են, թե՛ ազգերը, անհատները, որոնք որ սեփական կյանքը վտանգելով օգնել են հայերին և այլն: Հստակ գծված է միջազգային պայքարը, որով Հայաստանն ի լուր աշխարհի հայտարարում է, որ մեծագույն պարտականություն է ստանձնում ցեղասպանությունների կանխարգելման համար: Կարևոր է նաև իրավական պայմանները, որտեղ ներկայացվում է հայկական կողմի պահանջների իրական մակարդակը»:
Կարեն Բեքարյանը համարում է, որ եթե թղթածրարը պատշաճ կերպով պատրաստվի, ունենա իր ճանապարհը, կլինի Հայոց ցեղասպանության 100-րդ տարելիցի ձեռքբերումներից մեկը:
Կարդացեք նաև
Ամի ՉԻՉԱԿՅԱՆ
