«Human Rights Watch» միջազգային իրավապաշտպան կազմակերպությունը հրապարակել է «Հայաստանում մարդու իրավունքների 2014թ. վիճակը» ամենամյա զեկույցը, որտեղ բավականին կոշտ եւ բացասական գնահատականներ են հնչեցված Հայաստանի հասցեին։ Երբ համեմատում ենք այս հեղինակավոր կազմակերպության նախորդ եւ այս տարվա զեկույցները,
ակնհայտ է դառնում, որ վիճակը Հայաստանում ավելի վատացել է, ինչն էլ չի վրիպել կազմակերպության մասնագետների աչքից։
Հարկ է նկատել, որ տարիներ առաջ այսպիսի զեկույցները բուռն արձագանքի էին արժանանում Հայաստանում։ Ավելին՝ կոնկրետ այս կազմակերպության զեկույցը համարվում էր լուրջ իրադարձություն, որը տեւական ժամանակ մնում էր ներքաղաքական օրակարգի գլխավոր թեմաներից։ Ամեն անգամ նմանօրինակ զեկույցներից հետո իշխանությունը ջղաձգվում էր եւ գոնե մի որոշ ժամանակ ապրում էր մի քիչ «նեղված» հոգեվիճակով՝ փորձելով տպավորություն ստեղծել, թե իրենք ջանք ու եռանդ չեն խնայում վերը թվարկված խնդիրների լուծման ուղղությամբ։
Հիմա, երբ այլեւս անցյալում է Հայաստանի՝ եվրոինտեգրացման քաղաքականությունը, այսպիսի զեկույցները քննարկվում եւ իրադարձություն են դառնում բացառապես ՀԿ սեկտորում։ Եվ եթե առաջ պետական կառույցներն իրար հերթ չտալով սկսում էին մեղմ տոնայնությամբ հակադարձել զեկույցի հեղինակներին, ապա վերջին 1-2 տարում դրա համար այլեւս որեւէ կառույց ջանք Էլ չի թափում։
Կարդացեք նաև
Ասել է թե՝ ՀՀ իշխանության ներկայացուցիչները բացարձակ թքած ունեն, թե այսուհետ արեւմտյան կազմակերպությունները ինչպիսի գնահատականներով կարտահայտվեն իրենց եւ իրենց կառավարման որակի մասին։ Եթե առաջ բացասական բաները մտահոգում էին իշխանությանը, որովհետեւ ամեն այդպիսի գնահատական լուրջ սպառնալիք էր դառնում արեւմուտքից ստացվող գումարների չափի նվազման առումով, ապա հիմա, այսպես թե այնպես, փող չկա արեւմուտքից, եւ ուրեմն՝ ինչ ուզում են թող ասեն, դրանից ոչ մեկի գրպանի պարունակությունը չի տուժելու։ Այնպես որ, զեկույցների դարաշրջանը Հայաստանում ավարտված է։
Գոհար ՎԵԶԻՐՅԱՆ
Հոդվածն ամբողջությամբ կարող եք կարդալ «Չորրորդ իշխանություն» թերթի այսօրվա համարում
