ՀՀ Գեղարքունիքի մարզի ընդհանուր իրավասության առաջին ատյանի դատարանի 2014թ. հոկտեմբերի 23-ի դատավճռի դեմ բերվել է բողոք:
Վերաքննիչ դատարանը, դատավոր Արարատ Պետրոսյանի նախագահությամբ, կքննի Յուրիկ Բաբայանի գործով բողոքը:
Առաջին ատյանի դատարանն արագացված ընթացակարգով քննել է այս քրեական գործը:
Ամբաստանյալը միջնակարգ կրթությամբ է, ծառայում է ՀՀ ՊՆ զորամասերից մեկում՝ որպես 2-րդ գումարտակի կապի դասակի վարորդ:
Ըստ գործի նյութերի, շարքային Յուրիկ Բաբայանը 2014 թ. օգոստոսի 29-ին, զորամասի սպորտհրապարակում, վեճի մեջ էր մտել նույն զորամասի ժամկետային զինծառայող, շարքային Դավիթ Չարողյանի հետ, որի ընթացքում ձեռքերով հարվածներ էր հասցրել նրան:
Մեղադրանքի կողմի համաձայն, նա դրանով իսկ խախտել էր զինծառայողների փոխհարաբերությունների կանոնագրքային կանոնները, ինչի հետեւանքով վերջինիս առողջությանը պատճառվել է թեթեւ վնասի հատկանիշներ չպարունակող մարմնական վնասվածք:
2014թ. սեպտեմբերի 16-ին Յուրիկ Բաբայանը ներգրավվել է որպես մեղադրյալ՝ ՀՀ քրեական օրենսգրքի 359-րդ հոդվածի 1-ին մասով եւ նույն օրը նրա նկատմամբ խափանման միջոց է կիրառվել հրամանատարության հսկողության հանձնելը:
Մինչեւ դատաքննությունը սկսելը՝ ամբաստանյալ Յուրիկ Բաբայանը կամավոր միջնորդել է դատարանին իր նկատմամբ կիրառել դատական քննության արագացված կարգ: Նա հայտարարել է, որ խորհրդակցել է պաշտպանի հետ, գիտակցում է դատաքննությունն արագացված կարգով անցկացնելու հետեւանքները, առաջադրված մեղադրանքն իրեն պարզ է, համաձայն է մեղադրանքի հետ եւ իրեն մեղավոր է ճանաչում լիովին:
Ամբաստանյալ զինծառայողի միջնորդության դեմ մեղադրողը եւ տուժողը առարկություններ չեն ներկայացրել:
Ըստ գործի տվյալների, դատարանը հաստատված է համարել ամբաստանյալի խոստովանական ցուցմունքները, տուժող Դավիթ Չարողյանի, վկաներ Սերգո Օհանյանի, Էմանուել Խաչատրյանի եւ Վլադիկ Միրզոյանի կողմից նախաքննության ընթացքում տված ցուցմունքները:
Գործում առկա էր դատաբժշկական փորձաքննության եզրակացությունը՝ տուժողի վնասվածքների հետ կապված:
Դատարանը հանգել էր այն հետեւության, որ ամբաստանյալ Յուրիկ Բաբայանը կատարել է հանցագործություն` նախատեսված ՀՀ քրեական օրենսգրքի 359-րդ հոդվածի 1-ին մասով, որով եւ նա պետք է ենթարկվի քրեական պատասխանատվության եւ պատժի:
Պատժի տեսակը եւ չափը որոշելիս դատարանը հաշվի էր առել հետեւյալը.
Յուրիկ Բաբայանի պատասխանատվությունը եւ պատիժը մեղմացնող հանգամանք դիտել էր այն, որ վերջինս բնութագրվում է դրական, պատասխանատվությունը եւ պատիժը ծանրացնող հանգամանքներ չկային:
Դատարանն ամբաստանյալ Յուրիկ Բաբայանի նկատմամբ ՀՀ քրեական օրենսգրքի 70-րդ հոդվածով նախատեսված դրույթը` պայմանականորեն պատիժը չկիրառելու հնարավորությունը բացառել է, քանի որ «պատիժը պայմանականորեն չկիրառելով՝ հնարավոր չի լինի հասնել ՀՀ քրեական օրենսգրքի 48-րդ հոդվածով նախատեսված պատժի նպատակներին` սոցիալական արդարության վերականգնմանը, պատժի ենթարկված անձի ուղղմանը եւ հանցագործությունների կանխմանը»:
Յուրիկ Բաբայանը մեղավոր է ճանաչվել ՀՀ քրեական օրենսգրքի 359-րդ հոդվածի 1-ին մասով եւ դատապարտվել 3 ամիս ժամկետով՝ կարգապահական գումարտակում պահվելով:
Յուրիկ Բաբայանի նկատմամբ ընտրված խափանման միջոց` հրամանատարության հսկողության հանձնելը թողնվել է անփոփոխ՝ մինչեւ դատավճռի օրինական ուժի մեջ մտնելը:
«Առավոտ» օրաթերթ
29.01.2015
