«Չեմ կարծում, որ քվեարկության արդյունքում էական փոփոխություններ կլինեն»,- Aravot.am-ի հետ զրույցում, անդրադառնալով Եվրոպայի խորհրդի խորհրդարանական վեհաժողովի (ԵԽԽՎ) ձմեռային նստաշրջանում հունվարի 28-ին տեղի ունեցած քվեարկությանը` ՌԴ պատվիրակության ձայնի իրավունքի շուրջ, ասաց Քաղաքական եւ միջազգային հետազոտությունների կենտրոնի փորձագետ Ռուբեն Մեհրաբյանը:
Նա նշեց, որ հաշվի առնելով Ռուսաստանի քաղաքական քայլերը եւ անկախ նրանից, թե Հայաստանն ինչպես է քվեարկել ` ԵԽԽՎ-ում Ռուսաստանի ճակատագիրը կանխորոշված էր. «Հայաստանն ուղղակի քայլ արեց իրեն խաղից դուրս չհանելու համար, այլ է Ադրբեջանի պարագան` այնպես դասավորվեց, որ առանց այն էլ Ադրբեջանն արդեն լուրջ կոնֆլիկտ ունի Արեւմուտքի հետ` կապված իր ներքին քաղաքականության հետ, նա դա էլ փորձեց օգտագործել չափազանց անհաջող ձեւով, որպեսզի եւս մեկ անգամ կշտամբի Արեւմուտքին եւ Արեւմուտքին հակառակ քայլ անի, բայց դա որեւէ բանի չբերեց»:
Ռուբեն Մեհրաբյանի խոսքերով` քվեարկությունը քայլ էր առաջ. «Համենայն դեպս չկրկնվեց գոնե այն խայտառակությունը ՄԱԿ-ում, երբ Հայաստանը կանգնեց Զիմբաբվեի եւ նման կարգի այլ պետությունների կողքին, երբ դեմ քվեարկեց Ռուսաստանին դատապարտող բանաձեւին: Հիմա Հայաստանը գոնե փոքր, աննշան քայլ կատարեց երեսատեղ թողնելու համար»:
Հիշեցնենք` ԵԽԽՎ-ում Հայաստանի պատվիրակության անդամներից քվեարկությանը մասնակցել են Նաիրա Կարապետյանը, Հերմինե Նաղդալյանը եւ Մհեր Շահգելդյանը: Նրանք «ձեռնպահ» են քվեարկել: Իսկ Ադրբեջանի պատվիրակության անդամները զեկույցին «դեմ» են քվեարկել:
Կարդացեք նաև
Ամի ՉԻՉԱԿՅԱՆ
