Ռուսական ռուբլին դոլարի նկատմամբ արժեզրկվել է 34%-ով, իսկ Հայաստանում դրամն արժեզրկվել է տարվա կտրվածքով 17%-ով, եւ եթե միջազգային շուկայում այս փոփոխությունները կապված էին նավթի կտրուկ գնանկմամբ, ապա Հայաստանում ավելի շատ խուճապային վարքագծի հետեւանք էր: Այսօր «Մեդիա կենտրոնում» նման կարծիք հայտնեց
Մարդկային զարգացման միջազգային կենտրոնի փորձագետ, տնտեսագետ Աշոտ Խուրշուդյանը:
Նրա ներկայացմամբ, ավելի մտահոգիչ է ռուբլու անկումը, ինչի արդյունքում Ռուսաստանում աշխատող մեր հայրենակիցները, որոնք ռուբլով են վարձատրվում, ապա գալիս են Հայաստանում ծախսելու, նրանց եկամուտները 34%-ով նվազել են:
Տնտեսագետի դիտարկմամբ` ի տարբերություն Հայաստանի, Ռուսաստանի ավելի մեծ ինֆլյացիան, մեր մրցակցային դիրքը Ռուսաստանի հանդեպ կտրուկ նվազեցրեց. «Եվրասիական տնտեսական միություն մտնելով մենք միանգամից, կարելի է ասել արտահանման վրա մեծ տարիֆներ դրեցինք: Արդեն մեր արտադրողների համար կտրուկ սահմանափակում եղավ այս փոխարժեքների փոփոխության արդյունքում, եւ հակառակը` ռուսական արտադրողների համար հայկական շուկան դարձավ ավելի մատչելի: Ռուսական կաթը հանգիստ կարող է իջեցնել իր գինը Հայաստանում, իսկ հայկականն արդեն մրցակցության խնդիր է ունենում»:
Կարդացեք նաև
Քննարկման մեկ այլ մասնակից` «Այլընտրանք» հետազոտական կենտրոնի ղեկավար Թաթուլ Մանասերյանն էլ հետեւյալ հարցադրումն արեց` «Տնտեսությունը դինամիկ օրգանիզմ է, իսկ ո՞վ ասաց, տրանսֆերտային տնտեսությունը պետք է պահենք հավերժ, իսկ ո՞վ ասաց, որ դա է բացասական կամ դրական գործոնը, եւ ով ասաց, որ մենք չպետք է օգտվենք ռուսական ռուբլու թուլացումից, եւ հումք ներկրել` մեր տնտեսությունում օգտագործելու»:
Պարոն Մանասերյանը հորդորեց օգտվել ճգնաժամերից, եւ եթե 2015 թվականը կառավարությունը մրցունակության բարձրացման քաղաքականություն է որդեգրել, ապա պետք է «դռները բացել» նոր տեխնոլոգիաների, նոր սարքավորումների առջեւ:
Տնտեսագետը խորհուրդ է տալիս, որ տեղական արտադրության զարգացման համար ներկրվող տեխնոլոգիաներն ազատվեն մաքսատուրքերից:
Նելլի ԲԱԲԱՅԱՆ
Լուսանկարը՝ «Մեդիա» կենտրոնի
