«Շրջանառության հարկի մասին» օրենքի դեմ բողոքող «Կասեցում» քաղաքացիական շարժման համակարգող Սամսոն Գրիգորյանը բացատրում է, թե ինչու են իրենք նախորդ բողոքի ակցիայի ժամանակ մերժել վարչապետի հետ հանդիպումը. «Մենք հոկտեմբեր ամսին խոսել ենք վարչապետի, նախարարների, փոխնախարարների հետ, սակայն չենք հասել ոչնչի: Հիմա ժողովրդին բացատրել, որ մեր բարձրանալը օգուտ կբերի, շատ դժվար է: Ժողովուրդը չի հավատում իրենց: Հենց ժողովուրդն էլ որոշում է՝ բարձրանալու ենք, թե չէ»:
Շրջանառության հարկի դեմ բողոքող առեւտրականներն այս պահին իրենց բողոքի ձայնը որոշեցին բարձրացնել նաեւ նախագահի նստավայրի մոտ. «Բոլոր գործող իշխանությունների, բոլոր կառույցների մոտ գնալու ենք»,- ասում է շարժման ղեկավարը. «Մարդիկ պիտի հասնեն նրան, որ կարողանան իրենց երեխաներին պահել: Ամեն ինչ էլ հնարավոր է, գործադուլներ էլ կլինեն: Եթե օրենքը կիրառվեց, մեր խանութները փակվելու են, այսինքն՝ մեր տուն հաց չի մտնելու: Ուրեմն մենք օրենքի սահմաններում բոլոր քայլերին գնալու ենք»:
Սամսոն Գրիգորյանը վստահեցնում է՝ ով չի դիմի այդ քայլերին, երկիրը կլքի, իսկ արտագաղթն էլ կրկին կավելանա:
Էլյա ՀՈՎՀԱՆՆԻՍՅԱՆ
