Այս պահին նախագահականի դիմաց առեւտրականների ակցիան դեռ շարունակվում է: Նախագահականից ոչ ոք դուրս չի եկել եւ առեւտրականներին չի լսել:
Բողոքի ակցիայի վայր ժամանեցին Երեւանի ոստիկանապետ Աշոտ Կարապետյանը եւ փոխոստիկանապետ Վալերի Օսիպյանը: Լրագրողների հարցերին, թե ինչո՞ւ է եկել նախագահական, արդյոք իրավիճակը լարվա՞ծ է, պարոն Կարապետյանն ասաց. «Ոչ մի
լարված իրավիճակ էլ չկա, եկել եմ աշխատելու, իրավիճակը ստուգելու»:
Լրագրողների հարցին՝ նախագա՞հն է Ձեզ կանչել, նա ասաց, որ պարզապես եկել է իր գործն անելու, աշխատելու:
Կարդացեք նաև
Նա Վալերի Օսիպյանի հետ ցուցումներ է տալիս բողոքի ակցիան հսկող ոստիկաններին:
Աշոտ Կարապետյանից Aravot.am-ը հետաքրքրվեց՝ արդյոք ժամանե՞լ է այն պատճառով, որ իրավիճակն անվերահսկելի է դառնում, Երեւանի ոստիկանապետն ասաց, որ այդպես չի կարծում, ամեն ինչ վերահսկողության տակ է:
Երեւանի ոստիկանապետը ակցիայի 2-3 առաջնորդի հրավիրեց առանձնազրույցի: Լրագրողների հարցին՝ բացատրական աշխատանքնե՞ր եք տանելու նրանց հետ, փոխոստիկանապետ Վալերի Օսիպյանն ասաց՝ ոչ, նրանց հորդորում ենք օրենքի պահանջները չխախտել եւ շարժվել օրենքով: Բարձրաստիճան ոստիկաններն այս պահին էլ նախագահականի առջեւ են եւ հետեւում են ակցիայի մասնակիցների գործողություններին:
Նախագահականի դիմացի մայթին շարքային ոստիկանները մի քանի շարքով են պատ կազմել, որպեսզի առեւտրականները չկարողանան կրկին պատը ճեղքել եւ անցնել նախագահականի մայթ:
Լուսինե ԲՈՒԴԱՂՅԱՆ
