Կառավարության շենքի առաջ հավաքված առեւտրականներն այսօր պահանջեցին, որ ՀՀ ֆինանսների նախարար Գագիկ Խաչատրյանը պաշտոնից հեռանա, քանի որ, նրանց խոսքերով՝ շրջանառության հարկի նոր օրենքի քավորներից մեկը նա է:
Այսօր կառավարության շենքի առաջ ավելի մարդաշատ է, քան նախորդ ակցիաներին: Թերեւս այդ էր պատճառը, որ ոստիկանությունը այսօր տեղը տեղին պատրաստվել էր դիմավորելու առեւտրականներին: Բացի այն, որ կառավարության շենքի առաջ մեծ թվով ոստիկաններ են հսկում, ոստիկանական տասնյակ մեքենաներ կազմ ու պատրաստ սպասում էին կառավարության շենքի ետնամասում:
Կարդացեք նաև
Տասնյակ տոնավաճառների, առեւտրի կետերի առեւտրականներ պահանջում են օրենքը կասեցնել: Հակառակ դեպքում խոստացան գնալ ծայրահեղ քայլերի. «Թող չփորձի մեր միջոցներով հարկերը հավաքագրի, հարկեր չենք վճարելու, եթե կարող է թող Գագիկ Խաչատրյանը խոշորներին բերի հարկային դաշտ, եթե չի կարող՝ մենք նրան կբերենք ժողովրդի առաջ»:
Այս պահին, ինչպես առեւտրականներն ասացին, իրենց տաղավարները փակ են եւ արդեն որերորդ օրն է՝ իրենց աշխատանքը կաթվածահար է եղած. չեն կարողանում ոչ գումար հավաքել, ոչ էլ կենտրոնանալ գործի վրա:
Լուսինե ԲՈՒԴԱՂՅԱՆ
