Հունվարի 27-ին «Ա1+»-ի «Պոստ Սկրիպտում» հաղորդման ժամանակ Հայաստանում Ուկրաինայի դեսպան Իվան Կուխտան խոսելով Կիեւի Եվրոմայդանի, այնտեղ զոհված Սերգեյ Նիգոյանի մասին, ասել է, որ նա ծնվել է Ղարաբաղում, 2 տարեկան էր, երբ Նիգոյանների ընտանիքը տեղափոխվել է Դնեպրոպետրովսկի մարզ:
Սերգեյ Նիգոյանը Տավուշի մարզի Բերդի տարածաշրջանի Նավուր համայնքի ղեկավար Արամ Նիգոյանի արյունակից բարեկամն է:
Արամ Նիգոյանն ասաց, որ Նիգոյանները գյուղում փոքր տոհմ են: Նա հայտնեց, որ Սերգեյի մայրը Նավուրում մի քանի անգամ անհաջող ավարտով հղիություն է ունեցել, բժիշկները ասել են, որ դա կապված է Բերդի սահմանագոտում կատարվող դեպքերի պատճառով կնոջ ապրումների հետ:
1992թ. վերջին Սերգեյի մայրը հղի է եղել, երբ ընտանիքը տեղափոխվել է Ուկրաինա, Սերգեյը ծնվել է 1993թ. օգոստոսի 2-ին Դնեպրոպետրովսկի մարզի Սոլոնյանի շրջանի Բերեզնովատովկա գյուղում:
Կարդացեք նաև
Ա. Նիգոյանը հավելեց , որ 2014թ. հունվարի 22-ին Կիեւում Սերգեյ Նիգոյանի զոհվելուց հետո նրա հայրը՝ Գագիկը եղել է Նավուրում, այցելել իր տուն:
Այժմ Ուկրաինայում են ապրում Գագիկ Նիգոյանը, նրա հայրն ու մայրը, դուստրը: Իսկ Նավուրում գտնվող նրանց տանը ոչ ոք չի բնակվում:
Ոսկան ՍԱՐԳՍՅԱՆ
