ՀՀ նախագահ Սերժ Սարգսյանի հունվարի 26-ի ելույթում հնչեցրած «մեսիջները» ավելի շատ ուղղված էին ոչ միայն մեր հանրությանը, այլ համաշխարհային խաղացողներին: Aravot.am-ի հետ զրույցում այսպիսի կարծիք հայտնեց Կենտրոնական հրամանատարության հետախույզ, դիվերսիոն հատուկ նշանակության ջոկատի հիմնադիր հրամանատար Վովա Վարդանովը: «Ի՞նչը ինձ հետաքրքրեց նախագահի ելույթում, իր բնութագրելով ` էդ մաքրասեր թուրք առաջնորդ Էլչիբեյը, որ ուզում էր ոտքերը լվանար Սեւանում, նկատի ուներ, որ նմանատիպ մի մաքրասեր էլ 10 տարի է Բաքվի խանն է` Իլհամ Ալիեւը, ինքը նույն ձեւով հայտարարում է` « Երեւանը Իրեվանն է, որը Ադրբեջանի անբաժանելի հողն է, դա մենք կվերցնենք, շատ բարի ենք, նվեր ենք տվել»: Բայց առաջին անգամ նմանատիպ հայտարարություն գերագույն գլխավոր հրամանատարն է արել: Էն որ ասում են` կո’ւժ, քեզ կասեմ, կուլա’, դու լսի, ինձ թվում է ինքը ոչ թե մեզ է ասում, այլ համաշխարհային հանրությանը: Կարծում եմ, սա կապված է ոչ միայն ադրբեջանցիների ակտիվ պահվածքի հետ, այլ նաեւ մեր դաշնակից Ռուսաստանի` թուրքերի հետ սերտ հարաբերվելու հետ: Հիմա կարծես, թե խաղեր են գնում, մեր մի թեւը, շեշտում եմ` իրենք իրենց պաշտպանելով ռուսական ռազմաբազան` էդ թեւը ոնց որ ապահովում է իրենց, ոնց որ խաղեր են գնում, այդ ռուսական բազան հանելու վերաբերյալ: Ոնց որ թե նախագահն ասում էր թուրքերին, իրականում Կրեմլին էր լսեցնում, որ մենք կարող ենք ասիմետրիկ պատասխանենք փաստացի հակահայկական գործողություններին: Այսինքն` թուրքերի (նկատի ունի ադրբեջանցիներին Ն. Բ.) էդ ռազմատեխնիկական գործակցությունը, թուրքամետ քաղաքականությունը`ասենք ռազմաբազաների հարցում»,-նկատեց Վովա Վարդանովը:
Հիշեցնենք, որ Սերժ Սարգսյանը պաշտպանության նախարարին կից կոլեգիայի եւ հայկական բանակի կազմավորման 23-րդ տարեդարձին նվիրված հանդիսավոր նիստին ի թիվս այլ կոշտ հայտարարություններին, նաեւ ասել էր` «Մենք քսանհինգ տարի առաջ՝ ավելի բարդ ու դժվար պայմաններում, իրենց ավել-պակաս ելույթներն ու ախորժակը տեսել ենք: Այս դահլիճում հավաքվածների մեծ մասը, վստահ եմ, հիշում են, թե ինչպիսի հոխորտանքներ էին հղում նրանք 90-ական թվականների սկզբներին, թե ինչպես էին սպառնում Ստեփանակերտում ադրբեջանական դրոշ ծածանել, նրանցից մեկն այնքան էր իրեն կորցրել, որ խոսում էր Սեւանում իր ոտքերը լվանալու մասին, իսկ Շուշիից հետո ամեն շաբաթ կրկնում էին, որ կարճ ժամանակում Շուշիում թեյ են խմելու: Մենք այդ ամենը տեսել ենք: Չենք հոխորտացել, բայց մարտի դաշտում մեր գերակայությունն ենք նրանց պարտադրել: Այսօր մենք շատ ավելի պինդ ենք: Այնքան պինդ ենք, որքան երբեւէ չենք եղել»:
Aravot.am-ի այն հարցին` արդյոք այս ելույթից պատերազմին հանրությանը պատրաստվելու կոչ կա՞ր, կամ ասենք` ադրբեջանցիներին էր ակնարկում, որ մենք պատրաստ ենք պատերազմին, ինչպես որ վերջին օրերին նման կարծիքներ հնչեցին, պարոն Վարդանովն ասաց. «Ոչ, նման հոտ չեմ առնում:
Իսկ ի՞նչ է, թուրքերը սպասում էին, թե մեր նախագահն ինչ կասի, հա՞: Իրենք մեզանից լավ գիտեն, որ մենք պատրաստ ենք: Չէ, էդպիսի ելույթ չէր: «Մեսիջն» ուղղված էր գլխավոր խաղացողներին եւ նաեւ թուրքերին: Թուրքը լավ գիտի, մի գրամ չի կասկածում, որ լավ կծեծենք, էն ժամանակ բան չունեինք լավ ծեծեցինք, բա հիմա, որ մի քանի բան ունենք, ի՞նչ կանենք»:
Մեր այն հարցին էլ, թե ինչ կարծիք ունի վերջին շրջանում ադրբեջանցիների` ղարաբաղա-ադրբեջանական սահմանին ակտիվացման ու դիվերսիոն գործողությունների մասին, պարոն Վարդանովն ասաց, որ նման երկարատեւ պատերազմների դեպքում, իսկ մեզ մոտ 25 տարի է պատերազմ է,
Կարդացեք նաև
ցանկացած նման պատերազմ ռեսուրսների պատերազմ է, եւ եթե վերցնենք, ասենք` փողը կամ այլ ռեսուրսները, այդ իմաստով Ադրբեջանն առավելություն ունի, բայց անգամ այդ առավելությունը չի կարող թույլ տալ իրենց մեր զինված ուժերը ոչնչացնեն. «Շատ հեռավոր հեռանկարում շահեկան են, ասենք եթե մենք 1-ին 10 թուրք ենք սպանում, մեկ է, իրենք շահեկան են դուրս գալիս, որովհետեւ մեր եւ նրանց բանակը բնակչության ընդամենը 0.2%-է, մնացածը ոչ համաչափ է ավելանում ու զարգանում: Իրենք բարձր ծնելիություն ունեն, նրանց բնակաչության միջին տարիքն ավելի երիտասարդ է: Նույնիսկ 1-ին` 50 էլ սատկացնենք, ինքը հասկանում է այդ անմեղ խփվածի հետ ինչ-որ քանակի մարդիկ կհեռանան Հայաստանից: Իսկ իրենց մոտ նմանատիպ գործողություններ են լինում, հեռանում են ազգայնականները, վախեցած հարեւանները, եւ այլն, վերջապես իրենց բնակչությունը մեզանից մոտ 3 անգամ ավելի է, ու դա բերում դիզբալանսի: Իսկ հեռանկարում նման երկարատեւ պատերազմում ինքը կարող է հաղթել, որովհետեւ, նաեւ ազգային փոքրամասնություններին է ուղարկում առաջին գիծ»:
Վովա Վարդանովի դիտարկմամբ, այս տեսակի պատերազմն Ադրբեջանի իշխանությանը ձեռնտու է, քանի որ իր ներքին շուկայում խնդիրներ է լուծում. օրինակ` հնարավորություն է ստանում ազգային փոքրամասնություններին եւ ներքին ընդդիմությանը ճնշած պահել. «Ազգային փոքրամասնության երեխեքին է ուղարկում դիրքեր, եթե սպանվում են, փոքրամասնությունից են ն հիմնականում պակասում, եւ այլ նման հարցերում շահեկան են դուրս գալիս: Ես երկար ժամանակ է ասում եմ, որ պետք չէ ադեկվատ պատասխանել դրանց, այդպես մենք պարտություն ենք կրում: Կարծես թե, ասածս տեղ է հասել, որ ասում են` ասիմետրիկ պատասխան ենք տալու: Պետք է իրենց ցավոտ տեղերին խփել: Ի վերջո, այս ելույթում կային բաներ, որոնք ուղղված էին ոչ միայն Ադրբեջանին, հատկապես` Ռուսաստանին»:
Նելլի ԲԱԲԱՅԱՆ
