Էլեկտրոնային կառավարման ընդհանուր ցուցանիշով Երևանը լավագույն քաղաքների հնգյակում է, իսկ էլեկտրոնային կառավարման մատչելիության կամ օգտագործման հարմարավետության չափորոշիչով Հայաստանի մայրաքաղաքի պաշտոնական կայքը աշխարհի 100 խոշոր քաղաքների շարքում զբաղեցնում է 1-ին հորիզոնականը: Այս մասին փաստում է նախորդ տարեվերջին հրապարակված «Քաղաքների էլեկտրոնային կառավարում» 2013-2014 թվականների ուսումնասիրությունը, որը 2003 թվականից ի վեր իրականացվում է ԱՄՆ-ի հեղինակավոր Ռութգերս համալսարանի հանրային հարաբերությունների և վարչարարության դպրոցի էլեկտրոնային կառավարման ինստիտուտի կողմից: Ուսումնասիրության արդյունքներն առավել մանրամասն ներկայացվել են Երևանի քաղաքապետարանում հրավիրված մամուլի ասուլիսի ընթացքում:
Երևանի քաղաքապետի տեղակալ Վահե Նիկոյանը, խոսելով էլեկտրոնային կառավարման ոլորտում քաղաքապետարանի կողմից վերջին տարիներին իրականացված աշխատանքների և ձեռքբերումների մասին, նկատել է, որ էլեկտրոնային կառավարման հետազոտության համար ունենալով էլեկտրոնային կառավարման 104 ցուցիչներ և հինգ առանձին դասակարգման ոլորտներ՝ Ռութգերսի կառավարման գործիքն այսօր գործնականում ամենահամակողմանի և արդյունավետ ինդեքսն է:
119 էջից բաղկացած ուսումնասիրությունը, որն ամբողջությամբ հասանելի է համալսարանի կայքէջում, ներկայացնում է աշխարհի խոշոր 100 քաղաքների քաղաքապետարանների պաշտոնական կայքերի գնահատումն ըստ 5 հիմնական չափորոշինչների՝ անվտանգություն, մատչելիություն կամ օգտագործման հարմարավետություն, բովանդակություն, առաջարկվող առցանց ծառայություններ և քաղաքացիների ներգրավվածություն որոշումների կայացման գործընթացներին: «Յուրաքանչյուր ոլորտի կառավարման համակարգում, թերևս, դժվար է թերագնահատել տեղեկատվական տեխնոլոգիաների արդյունավետ կիրառման անհրաժեշտությունը, իսկ տեղական ինքնակառավարման համակարգում՝ առավել ևս, քանի որ այն հնարավորություն է ստեղծում ապահովելու համայնք-բնակիչ կապը: 2012 թվականին Երևանի քաղաքապետի նախաձեռնությամբ և հանձնարարությամբ քաղաքապետարանի պաշտոնական կայքն ամբողջությամբ և արմատապես վերափոխվեց՝ այդ պահից աշխատելով ամենօրյա կատարելագործման ռեժիմով: Կատարված աշխատանքի արդյունքներն ակնհայտ են»,- ընդգծել է Վահե Նիկոյանը:
Հատկանշական է, որ 2009 թվականի համանուն հետազոտությանը Երևանը չի ներառվել անգամ ուսումնասիրվող հարյուրյակում, այնինչ 2012-ին արդեն մեր մայրաքաղաքը զբաղեցրել է 19-րդ հորիզոնականը, իսկ 2014 թվականին գնահատողները էլեկտրոնային կառավարման տեսանկյունից Երևան քաղաքը որակել են որպես աշխարհի ամենաարագ զարգացող քաղաքներից մեկը: Ըստ էլեկտրոնային կառավարման ընդհանուր ցուցանիշի՝ աշխարհի առաջատար քաղաքը Սեուլն է, որին հաջորդում են Նյու Յորքը, Հոնկոնգը, Սինգապուրը և Երևանը: Ըստ առանձին չափորոշիչների՝ Երևանն առաջինն է մատչելիության կամ օգտագործման հարմարավետության անվանակարգում՝ առաջ անցնելով Բրատիսլավայից, Սեուլից, Տորոնտոյից և Ցյուրիխից: Մատչելիության ապահովման ցուցանիշում ներառված է տարբեր սարքերով, այդ թվում՝ բջջային հեռախոսներով կայքից օգտվելու մատչելիությունը: Կարևոր հանգամանք է համարվել նպատակային լսարանին ուղղված հղումները կայքի գլխավոր էջից, հիմնական էջերի ստանդարտները, լրացվող դաշտերի հարմարավետությունը, ինչպես նաև որոնման համակարգը, ընդլայնված որոնում իրականացնելու հնարավորությունը:
Կարդացեք նաև
«Երևանի կառավարման տեխնոլոգիաների կենտրոն» ՓԲԸ տնօրեն Սարգիս Մանուկյանը, ներկայացնելով այն հիմնական բաղադրիչները, որոնք ապահովել են ուսումնասիրության արդյունքը, նշել է, որ, օրինակ, քաղաքացիների ներգրավվածության անվանակարգում Երևանը զբաղեցնում է 3-րդ հորիզոնականը՝ զիջելով միայն Սեուլին և Սինգապուրին: Անդրադառնալով բովանդակության անվանակարգին, որտեղ Երևանը 4-րդն է Սեուլից, Տորոնտոյից և Ստոկհոլմից հետո, նշվել է, որ գնահատողները հաշվի են առել հասանելիությունը դեպի կոնտակտային տեղեկություններ, հրապարակային փաստաթղթերը, հասանելիությունը հաշմանդամների համար, մուլտիմեդիայի նյութերը և հրատապ տեղեկատվությունը:
«Հարկ է նշել, որ ուսումնասիրությունն իրականացնող մասնագետների գնահատմամբ շատ քիչ թվով պետական կառույցներ են առաջարկում քաղաքացիների ներգրավման առցանց հնարավորություն: Երևանի քաղաքապետարանի պաշտոնական կայքին տրված գնահատականը մեր ամենօրյա աշխատանքի արդյունքն է: Ի դեպ, պետք է նշեմ, որ ուսումնասիրության իրականացման մասին քաղաքապետարանը տեղյակ չի եղել»,- նշել է Սարգիս Մանուկյանը:
Ներդրված էլեկտրոնային ծառայություններից առանձնացվել են քաղաքապետարանի գործունեության ոլորտների վերաբերյալ մի շարք առցանց ծառայություններ՝ մասնավորապես Երևանի ինտերակտիվ բյուջեն, տարբեր դիմումների ձևերի ներբեռնման, առցանց դիմումի, ինչպես նաև հարկերի մասին տեղեկատվության տրամադրման և առցանց վճարելու հնարավորությունները: «Էլեկտրոնային կառավարումը բաղկացած է թե՛ թվային քաղաքապետարանից (հանրային ծառայությունների առցանց մատուցում) և թե՛ թվային ժողովրդավարությունից (քաղաքացիների մասնակցություն կառավարման գործընթացին): Երկու բաղկացուցիչներն էլ հավասարապես կարևոր են քաղաքների գնահատման համար»,- ուսումնասիրության մեթոդաբանությունում պարզաբանել են Ռութգերսի համալսարանի պրոֆեսորները և ընդգծել, որ առաջին տասնյակում ընդգրկված քաղաքները հենց այդ հատկանիշներով են առանձնանում:
«Ներկայացված ուսումնասիրության ցանկում առաջատար դիրքերում գտնվող քաղաքներն արդեն երկար տարիներ մեծ փորձ ունեն էլեկտրոնային կառավարման ոլորտում: Այս տեսանկյունից մեզ համար իսկապես մեծ ձեռքբերում էր նման բարձր հորիզոնական զբաղեցնելը: Միաժամանակ պետք է նշեմ, որ մենք չենք բավարարվելու ձեռք բերածով, և առաջիկայում մեծ աշխատանքներ կիրականացվեն ոլորտի կատարելագործման ուղղությամբ, ինչի արդյունքները մեր համաքաղաքացիների համար շուտով տեսանելի կլինեն» ,- ընդգծել է քաղաքապետի տեղակալ Վահե Նիկոյանը:
Երևանի քաղաքապետարան
