«Արաբկիր» բժշկական կենտրոնում մահացած Լիա Միսակյանի մահվան գործն այսօր վերսկսվեց Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանում:
Մանկաբույժներ Լիլիթ Վարդանյանի եւ Զարինե Այվազյանի պաշտպանները քրեական գործին նոր ապացույցներ կցելու հետ կապված տարբեր դիրքորոշումներ ունեին:
Երեմ Սարգսյանը այս փուլում որեւէ միջնորդություն չարեց, իսկ Գիվի Հովհաննիսյանը դատարանին ներկայացրեց մի շարք հարցումների պատասխաններ, որոնք միջնորդեց, որպեսզի կցի քրեական գործի նյութերին:
Մասնավորապես, նա հարցում էր կատարել «Արաբկիր» բժշկական կենտրոն, կապված հերթապահությունների հետ:
Կարդացեք նաև
Եղել է շուրջօրյա հերթապահություն՝ ըստ պատասխանի, գործել է լաբորատորիան, դինամիկ հսկողության տակ են եղել 102 հիվանդ, իսկ Լիլիթ Վարդանյանի հսկողության տակ են եղել նրանցից 4-5 երեխա, համեմատաբար ծանր վիճակով. նրանք հետագայում ապաքինվել են:
Մեկ այլ հարցման համաձայն՝ ստացվել էր բոքսային բաժանմունքի բուժաշխատողի պայմանագիրը, թե նա ինչ պետք է անի, ինչ հանձնարարականներ է ստանում բուժող բժշկից:
Ստացվել էր նաեւ առողջապահության նախարարի հրամանը, որով սահմանվել են այն չափորոշիչները, որոնցով առաջնորդվում են բուժաշխատողները:
Կար նաեւ ախտորոշման մասին, փորձագետների իրավունքների եւ պարտականությունների մասին փաստաթուղթ, որը, ըստ պաշտպան Գիվի Հովհաննիսյանի թերի է եղել, քանի որ փորձագետները սխալ ախտորոշում են արել:
Դատախազը չառարկեց, որ սրանք կցվեն գործին, երեխայի հայրը՝ Գեորգի Միսակյանն առարկեց, իսկ նրա ներկայացուցիչ Արթուր Սաքունցը պահանջեց պատճենները, որոնց ծանոթանալու համար դատավոր Լեւոն Ավետիսյանը 20 րոպե ժամանակ է տվել դիրքորոշումն արտահայտելու համար:
