Ստրասբուրգում շարունակվում է Եվրոպայի խորհրդի խորհրդարանական վեհաժողովի (ԵԽԽՎ) ձմեռային նստաշրջանի առաջին օրվա լիագումար նիստը: Ելույթով հանդես եկավ Բելգիայի արտաքին գործերի նախարար Դիդիե Ռեյնդերսը:
Նա դատապարտեց փարիզյան իրադարձությունները և ՌԴ քաղաքականությունը Ուկրաինայի նկատմամբ: Հարցուպատասխանի ժամանակ ԵԽԽՎ-ում Ադրբեջանի պատվիրակության ղեկավար Սամադ Սեիդովը, օգտագործելով ԵԽԽՎ ամբիոնը, ինչպես և սպասվում էր, բարձրացրեց այս տարվա ամռանը դիվերսիոն գործողություն իրականացրած Դիլհամ Ասկերովի եւ Շահբազ Գուլիեւի հարցը:
Նա այդ հարցը ներկայացրեց որպես «Լեռնային Ղարաբաղի անջատողական ռեժիմի «դատարանի» կողմից «դատապարտված» ադրբեջանցի գերիներ Դիլհամ Ասկերովի եւ Շահբազ Գուլիեւի հարց» և ԵԽԽՎ անդամներից պահանջեց բողոքի նոտա հղել ընդդեմ այդ «դատական» շոուի: Ադրբեջանցի պատվիրակի հուզական ելույթին սառը և կարճ պատասխան տվեց Բելգիայի ԱԳ նախարարը: Նա, առանձնապես չկարևորելով, հնչած հարցը, նշեց. «Այդ հարցի վերաբերյալ որևէ մտահոգություն կամ առանձնակի ակտիվություն չեմ տեսել ԵԽԽՎ նախարարների խորհրդում: Համենայն դեպս, մինչև իմ այցը Հայաստան կփորձեմ պարզել իրավիճակը: Ձեր հարցը ընդունում եմ ի գիտություն»:
Տաթև ՀԱՐՈՒԹՅՈՒՆՅԱՆ
