Դեռեւս անցյալ տարվա դեկտեմբերից հայաստանյան մի շարք բանկեր խուսափում են վարկեր տրամադրել: Եվ, չնայած, տարբեր միջոցներով բանկերը գովազդում են վարկավորելու պայմանները, սակայն հաճախորդների` վարկ ստանալու խնդրանքով այս կամ այն բանկին գրված դիմումները ամիսներով մնում են բանկերում` անպատասխան: Բանկի պատասխանատուները ոչ հա են ասում, ոչ` չէ:
Aravot.am-ի հետ զրույցում տնտեսագետ Վիլեն Խաչատրյանը բանկերի` վարկավորման դադարեցումը պայմանավորում է վերջին ամիսներին ստեղծված անորոշ իրավիճակով եւ վերջերս Կենտրոնական բանկի կողմից վերաֆինանսավորման բարձրացմամբ, ինչը, տնտեսագետի մեկնաբանմամբ, նշանակում է անցնել թանկ փողերի քաղաքականությանը. «Այսինքն`վարկ ձեռբերելը թանկանում է: Բանկերը, սկզբնական շրջանում խուսափում են վարկեր տալուց` մինչեւ որ հասկանան`ինչ է կատարվելու: Մինչեւ բանկերը չհասկանան ինչ է կատարվում` տնտեսության մեջ վարկավորումն ինչքան է, իրենց դիրքերը եւ այլն, բանկերը վարկեր չեն տալու: Հիմա բանկերում սպասողական վիճակ է»:
Պարոն Խաչատրյանի խոսքերով, 2009-ի ֆինանսական ճգնաժամի ժամանակ էլ
բանկերը, ժամանակավորապես, դադարեցրել էին վարկեր տալու գործընթացը:
Անդրադառնալով Հունաստանի ֆինանսական շուկայում տիրող իրավիճակին, որի հետեւանքով կանխատեսվում է եվրոյի արժեզրկում, ասաց, որ Հունաստանի` Եվրամիությունից դուրս գալը կարող է դեֆոլտի իրավիճակի հասցնել Եվրոպան եւ բավականին լուրջ տնտեսական ցնցում առաջացնել, հատկապես` գերմանական բանկերի համար, որոնք Հունաստանի պարտքի ֆինանսավորողն են հանդիսացել:
Կարդացեք նաև
Լուսինե ԲՈՒԴԱՂՅԱՆ
