ԱԺ Պետաիրավական հանձնաժողովում վերջերս լսումներ էին կազմակերպվել Գյումրիի դեպքերի հետ կապված:
Այսօր «Հայելի» ակումբում հանձնաժողովի նախագահ Հովհաննես Սահակյանը, հարցին՝ Ձեզ բավարարեցի՞ն գլխավոր դատախազի բացատրությունները՝պատասխանեց. «Գյումրիի դեպքերը սգալուց եւ ողբերգությունից զատ՝ այլեւս քաղաքականացվում են: Կան հարցեր, որոնք կապված են լսումների հետ: Տեւել են դրանք 2.5 ժամ, հնչել են 2 տասնյակից ավելի հարցադրումներ: Ինքս իրավաբան եմ, գիտեք, որ նախաքննության փուլում գործի հանգամանքների հետ կապված որեւէ մեկը որեւէ բան չի կարող ասել, ոչ թե չի ցանկանում ասել, այլ դա արգելված է: Ես զարմանում եմ, որ իմ գործընկերները կարող էին խոսել տեղ չլինելու եւ պայմանների մասին, այնպիսի տպավորություն էր, որ 5-6 ժամ կանգնած թռիչք էին ունենալու: Գլխավոր դատախազը ուղիղ պատասխանեց ցանկացած հարցի: Սրա նպատակն այն էր, որ միջազգային հանրությունը տեսնի, որ ԱԺ-ի ուշադրության կենտրոնում է այդ հարցը: Այնտեղ նստած հարց տվողներն ու բորբոքվողներն ինչո՞ւ իրենք չեն նախաձեռնում այդ քննարկումները: Շատ դժվար էր նման պատասխանատվություն վերցնել՝ 7 զոհ կա, հաշվի ենք առել զգացմունքայնությունը: Բոլորը ցանկանում էին իմանալ՝ ինչպես եւ ինչու տեղի ունեցավ այդ ողբերգությունը: Մենք ՌԴ պատգամավորների հետ էլ գնացինք Գյումրի, իրենց շփոթված հայացքները, արտահայտությունները բառերով չենք կարող նկարագրել: Բոլորին մի շարք հարցեր կան, որ հետաքրքիր են»:
Գլխավոր դատախազին ուղղված այն մեղադրանքներին, որ ռուս սահմանապահները պետք է Պերմյակովին սահմանը հատելիս բռնելուց հետո հայտնեին եւ հանձնեին հայկական կողմին եւ այդ մասով քրգործ չի հարուցվել՝ Հովհաննես Սահակյանն այսպես մեկնաբանեց. «Հանցագործությունը սկսվել է մի տեղ, ավարտվել մեկ այլ տեղ: Ավետիսյանների սպանությունից հետո միգուցե մեկ այլ տեղ էլ գողություն է արել: Գործի հանգամանքները պարզվում են: Իրավական գործընթաց է, պետք է ամբողջ գործի հանգամանքները պարզեն: Դեռեւս պարզում են ինչպիսի հանգամանքներ են եղել, հետո գնահատեն՝ սահմանապահը որտեղից է վերցրել, բռնել է, ինչո՞ւ չի հանձնել, պե՞տք է հանձնել, թե՞ չպետք է, հանձնել , մերո՞նք չեն վերցրել եւ այլն»:
Մեր հարցին՝ Զարուհի Փոստանջյանն ասում էր, որ այստեղ հայկական կողմը անգործություն է դրսեւորել, մասնագիտական առումով անգործություն տեսնո՞ւմ եք այդտեղ, թե՞ չէ՝ Հովհաննես Սահակյանը պատասխանեց, որ անթույլատրելի է քաղաքական դիվիդենտներ շահել այս դեպքի հետ կապված. «Լսումների ժամանակ ի՞նչ էր կատարվում, դա դիվիդենտ էր»:
Կարդացեք նաև
Մեր հարցին՝ եթե նախաքննության փուլում Գեւորգ Կոստանյանը չէր կարող որեւէ հարցի պատասխան տալ, չի՞ ստացվում, որ իսկապես «գալչկայի» համար էին այդ լսումները, ինչպես քննադատեց Նաիրա Զոհրաբյանը՝ Հովհաննես Սահակյանը պատասխանեց. «Այնպիսի տպավորություն է, որ Գեւորգ Կոստանյանը կամ ես խնդրել ենք, որ լսումներ անցկացնենք: Տպավորություն է, որ մենք խնդրել ենք գանք այնտեղ նստենք, մարդիկ այնտեղ ինքնադրսեւորվեն, դիվիդենտ հավաքեն, շոուներ անեն: Ամեն ինչ տեսանելի է: Տպավորություն է, որ մենք խնդրել ենք գնանք այնտեղ նստենք, մեզ քարկոծեն ու քննադատեն: Նպատակը հետեւյալն էր՝ ընդդիմադիր գործընկերների հետ քննարկեցինք, որոշեցինք լսումներ անել, որ միջազգային հանրությանը ցույց տանք, որ մեր ուշադրության կենտրոնում է դա: Սա այդ 7 սպանությունից դուրս կարող է լինել ազգային անվտանգության խնդիր, կարող է սադրանք լինել: Մարդկանց ձեռնտու չի՝ ինչո՞ւ պետք է ռուսական զորքերը պահեն հայ-թուրքական սահմանը եւ դիվերսիաներ չլինեն: Սա հա՞րց է, թե՞ հարց չի»:
ՀՀԿ պատգամավորը նաեւ նշեց. «Հասկանում եմ մեր հայ փաստաբանին, որովհետեւ գերմարդկային ուժ էր պետք՝ ուր գնաս ու ինչ արդարացնես: Միգուցե մեզ պետք էր, որ ինքը լիներ, բայց նաեւ իրեն եմ հասկանում»:
Հռիփսիմե ՋԵԲԵՋՅԱՆ
