Այս պահին կառավարության շենքի դիմաց Երեւանի մի շարք տոնավաճառների աշխատակիցներ Շրջանառության հարկի մասին նոր օրենքի կասեցման պահանջով բողոքի ակցիա են անցկացնում: Նրանք դժգոհում են, որ անհարկի ավելացել են թղթաբանական աշխատանքները, ինչի արդյունքում իրենց եկամուտները էապես նվազում են:
Քիչ առաջ կառավարության նամակների ընդունման բաժնի պետը նրանց առաջարկեց ժամը 1-ին հանդիպել վարչապետ Հովիկ Աբրահամյանի հետ, բայց հավաքվածները մերժեցին ներկայացուցչական խումբ ուղարկել հանդիպմանը՝ պահանջելով, որ վարչապետն անձամբ իջնի ներքեւ եւ բոլորի ներկայությամբ իրենց հարցերին պատասխան տա:
Հավաքվածները պնդում են, որ այսօր այստեղից չեն հեռանալու՝ մինչեւ իրենց հարցին լուծում չտրվի: Նրանք համաձայն են աշխատել հին օրենքով, միայն թե նորը չգործի:
Կարդացեք նաև
Աշխատակիցներից մեկն ասում է. «Փոխանակ մտածեն հարկերը իջեցնեն, ժողովրդի վիճակը լավացնեն, հարկերն են ավելացնում, ոչ մի երկրում նման բան չկա»:
Արփինե ՍԻՄՈՆՅԱՆ
