Քաղտեխնոլոգ Արմեն Բադալյանը Aravot.am-ի հետ զրույցում կարծիք հայտնեց, որ Ռոբերտ Քոչարյանի հարցազրույցում բազմաթիվ հակասություններ կան, ու հարցազրույցի մեխն էլ այն է, որ ՀՀ երկրորդ նախագահը անընդհատ շեշտում է, թե իր ժամանակ ավելի լավ էր. «Հիմնական մեխն այն է, որ ինքն ուզում է տարանջատվել այսօրվա իշխանություններից, ինչը նրան չի հաջողվում, որովհետեւ երկրորդ եւ երրորդ նախագահներն, ըստ էության, նույն մարդիկ են»:
Ըստ քաղտեխնոլոգի, զարմանալի է, որ Ռոբերտ Քոչարյանը մեջբերում է տնտեսագետների շրջանում տարածված այն կարծիքը, թե ճգնաժամին իշխանությունների համբավը և կառավարչական արդյունավետությունը հաճախ ավելի կարևոր են, քան հիմնարար գործոնները, չհիշելով իր ժամանակների մասին. «Խոսում է բենզինի շուկայում մենաշնորհների մասին: Հավանաբար մոռացել է, թե ո՞վ էր այդ շուկայում եւ մնացած բոլոր շուկաներում մենաշնորհները հաստատել: Այնպիսի տպավորություն է ուզում ստեղծել, որ ինքը կապ չունի 1998-2008 թվականների հետ»:
Ըստ մեր զրուցակցի, այն ամենն ինչ առկա է այսօր՝ բոլոր համակարգերում, Ռոբերտ Քոչարյանի կառավարման ժամանակի քաղաքականության օրգանական շարունակությունն է:
Արմեն Բադալյան
Մեր զրույցի ընթացքում անդրադարձ եղավ Ռոբերտ Քոչարյանի հարցազրույցի այն հատվածին, թե «Երկրին անհրաժեշտ են արմատական փոփոխություններ, բայց խոսքը հաստատ սահմանադրական ռեֆորմների մասին չէ: Չէի ուզենա հերթով թվարկել բոլոր ակնհայտ ու անհրաժեշտ քայլերը: Հայաստանում և կոնկրետ՝ կառավարությունում, իմ կարծիքով, քիչ չեն այն մարդիկ, որոնք առնվազն հասկանում են, թե ինչ է պետք անել առաջին հերթին: Հաջողության հասնելու ճանապարհին ամենամեծ խոչընդոտը կլինի քաղաքական էլիտայի տնտեսական շահերի բախումը երկրի երկարատև շահերի հետ»:
Կարդացեք նաև
Արմեն Բադալյանի խոսքերով. «Ինքը խոսում է բարեփոխումների մասին, բայց դրանք Հայաստանում, Բաղրամյան 26-ում չեն որոշվում, դա կարող է որոշել միայն Մոսկվան, իսկ այսօրվա կախվածությունը Քոչարյանի իրականացրած «Գույք պարտքի» դիմաց քաղաքականության շարունակությունն է: Ինքը խոսում է ազգային նվաստացման քաղաքականության մասին, բայց հենց ինքն է ազգային նվաստացման քաղաքականության հիմնադիրը, որ մեկը հիշեցնեմ՝ «Գույք պարտքի դիմաց», 2004-ի ապրիլի դեպքերն ու ցույցերը, մարտի 1-ը, երբ օրենք խախտելով զորք մտցրեց, ինչը բերեց բախումների»:
Գոհար ՀԱԿՈԲՅԱՆ
