«Իրավիճակը կանխատեսելի է: Հասկանալի է, որ 2015-ը յուրահատուկ կարեւորություն ունի, եւ բնականաբար, Ադրբեջանը պետք է ինչ-որ չափով օգներ իրենց գործընկեր Թուրքիային: Բացի այդ, հաշվի առնելով, որ նավթի գների անկում էլ կա եւ որոշակի լարվածություն, ՀՀ-ն պետք է գիտակցեր ու կանխատեսեր, որ սահմանում էլ կլիներ լարված»,- այսօր «Հայելի» ակումբում սահմանային լարվածության մասին խոսելիս այսպիսի գնահատական տվեց «Ժառանգություն» խմբակցության պատգամավոր Թեւան Պողոսյանը:
Հիշեցնենք, որ այսօր Տավուշի մարզի սահմանային գոտում իրավիճակը լարված է, հակառակորդը 1 գիշերվա ընթացքում շուրջ 300 անգամ խախտել է զինադադարը եւ եղել են դիվերսիաների փորձեր:
«Ազգային անվտանգություն» կուսակցության նախագահ Գառնիկ Իսագուլյանի խոսքերով՝ «Մենք պետք է պատրաստ լինենք ցանկացած խնդրի: Նրանց ակտիվությունը բացառապես պայմանավորված է մեր պասիվությամբ»:
Խոսելով Գյումրիի դեպքերի մասին՝ Գառնիկ Իսագուլյանը տարակուսանք հայտնեց, որ ողջ հասարակությունը պահանջում է, որ Պերմյակովի ոճրագործությունը քննի հայկական կողմը, երբ Մարտի 1-ի դեպքերի, Հոկտեմբերի 27-ի ժամանակ կատարյալ անվստահություն էր հայտնել այդ նույն մարմիններին:
Կարդացեք նաև
Ըստ նրա, պետք է վարչապետը, նախագահը, իրավապահները բոլորը հավաքվեին, ընդհանուր տեսակետ ձեւակերպեին եւ դա ասեին ժողովրդին, որ հակասություններ չլինեին: Ըստ Թեւան Պողոսյանի, պատգամավորների տեսակ կա, որ չի կարդում որեւէ պայմանագիր. «Իսկապես, տեղի է ունեցել շատ խնդիրների սխալ գործընթաց, որի համար քննություն պետք է գնա՝ սկսած նրանից, թե ինչ գործողություններ պետք է ձեռնարկեին, որ չեն ձեռնարկել: Կան մի շարք խախտումներ սահմանապահների կողմից»:
Թեւան Պողոսյանը համաձայնեց երկրորդ նախագահ Ռոբերտ Քոչարյանի հետ, որ ՀՀ իշխանությունները Գյումրիի դեպքերից հետո արել են լղոզված, իրարամերժ հայտարարություններ. «Ես դա ավելի շուտ եմ ասել, ասել եմ, որ անգործություն է եղել»:
Ըստ Գառնիկ Իսագուլյանի, ռուսական կողմին այս ամեն ինչը ձեռնտու չէր, բայց տեղի է ունեցել, եւ այսօր նրանք շահագրգռված են գործը բացահայտելու. «Ուրիշ բան, որ մերոնք, որպես պետություն, պետք է մասնակցեն այդ ամբողջ գործողությունների հետ: Տեղի է ունեցել սխալ, այլ բան է, որ մեր իրավապահները բռնեին, իրենք էլ դատեին: Հայտնվել է նա ռուսական բազայում»:
Մեր հարցին՝ այն, որ Պուտինի մամուլի խոսնակը հայտարարում է, որ Պերմյակովը պետք է դատվի ՌԴ օրենսդրությամբ, դա ճնշում չէ՞ հայկական կողմի վրա, Գառնիկ Իսագուլյանը պատասխանեց, որ եթե Հայաստանը լիներ անկախ պետություն, Պուտինի մամուլի խոսնակի ասածը չէին լսի:
Գառնիկ Իսագուլյանը կոչ արեց, որ ամեն մեկն իր հերթին կոչ անի, նամակով, այլ կերպ դիմի իշխանություններին, պահանջատեր լինի. «Դատախազը որոշակի լիազորություններ ունի, ՊՆ նախարարը, արտգործնախարարը՝ չեն անում: Պահանջեք, ձեր պահանջն ումի՞ց է՝ ռուսների՞ց»:
Մեր հարցին՝ Դուք լավ հարաբերություններ ունեք, չէ՞ Սերժ Սարգսյանի հետ, ինչո՞ւ չեք դիմում, ինչո՞ւ չեք ասում՝ նա պատասխանեց. «Այո, ես իրեն հազար ու մի բան եմ ասել: Ցավոք սրտի, հազար ու մեկը չի կատարվել: Դրա համար իմ ինստիտուտը փակվեց, դրա համար ես հրաժարական տվեցի, որովհետեւ ադեկվատ չեն իրավիճակին»:
Անդրադառնալով երեկ գլխավոր դատախազ Գեւորգ Կոստանյանի այն հայտարարությանը, որ ինքը ոչինչ չի որոշում՝ Գառնիկ Իսագուլյանը պատասխանեց. «Չի որոշում, թող հրաժարական տա: Երբ ես իմացա, որ ես չեմ որոշում՝ հրաժարական տվեցի: Թող ինքն էլ հրաժարական տա»:
Հռիփսիմե ՋԵԲԵՋՅԱՆ
