Aravot.am-ը ֆինանսների նախարարությունից հետաքրքրվեց, թե ԲՀԿ առաջնորդ Գագիկ Ծառուկյանին պատկանող «Երեւանի Արարատ կոնյակի-գինու-օղու կոմբինատ» ԲԲԸ-ում սկսած հարկային ստուգումներն արդյոք պլանայի՞ն են:
«Ժողովուրդ» օրաթերթի հաղորդմամբ, hարկայինը, անցյալ տարվա դեկտեմբերից, լայնածավալ ստուգումներ է սկսել Գ. Ծառուկյանին պատկանող «Երեւանի Արարատ կոնյակի-գինու-օղու կոմբինատ»-ում եւ այդ ստուգումները ոչ թե պլանային են, այլ` արտահերթ: Կոմբինատում ստուգումներ անցկացնելու փաստը հաստատել է նաեւ Գագիկ Ծառուկյանի մամուլի քարտուղար Իվետա Տոնոյանը:
Հիշեցնենք, որ անցյալ տարի կառավարության նոյեմբերի 27-ի նիստում ՀՀ վարչապետ Հովիկ Աբրահամյանը ՀՀ ֆինանսների նախարար Գագիկ Խաչատրյանին հանձնարարեց օրերով ու շաբաթներով լարվածության մեջ չպահել տնտեսվարողին եւ սահմանափակել յուրաքանչյուր օրացուցային տարում ՀՀ հարկային մարմինների կողմից օպերատիվ-հետախուզական միջոցառումները մեկ անգամով, մեկից ավելի անգամ ստուգումները վերապահելով միայն բացառիկ դեպքերում՝ խիստ ծանրակշիռ փաստարկների պարագայում՝ վարչապետի թույլտվությամբ:
Aravot.am-ի հարցին, ի պատասխան, ֆիննախից հայտնեցին, որ «Երեւանի «Արարատ» կոնյակի-գինու-օղու կոմբինատ» ԲԲԸ-ն, անցյալ տարվա դեկտեմբերի 20-ին, ինքն է դիմել ֆինանսների նախարարություն` ավելացված արժեքի հարկի զրոյական դրույքաչափով հարկվող գործարքների մասով գումարների հաշվանցման եւ (կամ) վերադարձի խնդրանքով:
Կարդացեք նաև
Ֆիննախից նաեւ նշել էին. «Վերոհիշյալ դիմումի, ինչպես նաեւ «Ստուգումների կազմակերպման եւ անցկացման մասին», «Հարկերի մասին» ՀՀ օրենքների պահանջներին համապատասխան «Երեւանի «Արարատ» կոնյակի-գինու-օղու կոմբինատ» ԲԲԸ-ում 2014թ. դեկտեմբերի 27-ից ՀՀ ՖՆ կողմից իրականացվում է ավելացված արժեքի հարկի զրոյական դրույքաչափով հարկվող գործարքների մասով գումարների վերադարձի ուսումնասիրություն:
Լուսինե ԲՈՒԴԱՂՅԱՆ
