ՀՀ գլխավոր դատախազ Գեւորգ Կոստանյանը, որը հունվարի 15-ին գյումրեցիներին խոստացել էր դիմել Ռուսաստանի գլխավոր դատախազ Յուրի Չայկային՝ Պերմյակովին Հայաստանին հանձնելու համար, դեռ չի դիմել իր ռուս կոլեգային։
«Ես՝ որպես գլխավոր դատախազ, տղամարդավարի ձեզ ասում եմ, որ այս պահանջով միանշանակ դիմելու եմ ՌԴ գլխավոր դատախազին»,- հայտարարել էր Կոստանյանը բողոքի դուրս եկած զյումրեցիների առջեւ։
Երեկ «ՀԺ»-ն մի շարք հարցեր է ուղարկել ՀՀ գլխ. դատախազին։ Մասնավորապես կատարե՞լ է նա իր տված խոստումը, թե ոչ, եթե ոչ, ապա ինչո՞ւ, եւ ե՞րբ է պատրաստվում դա անել, արդյոք այս օրերին արդեն գտնվե՞լ են այն իրավական հիմքերը, որոնց համաձայն ռուսական կողմը պետք է ոճրագործին հանձնի հայկական կողմին։ Եթե այո, ապա որո՞նք են դրանք, եւ ընդհանրապես՝ ի՞նչ իրավական պրոցեսներ են այս փուլում ընթանում Պերմյակովի գործով։
Գրավոր հարցմանը գլխ. դատախազության հանրային կապերի բաժնից պատասխանել են հետեւյալը. «Բնականաբար, այդ նամակը գրվելու է, որովհետեւ բացի խոստումը, դա նաեւ ՀՀ գլխավոր դատախազի ուղիղ պարտականությունն է, բայց քանի որ այս նամակը իրենից ներկայացնում է իրավական փաստաթուղթ, այն գրելու համար անհրաժեշտ են իրավական հիմքեր։ Քննչական գործողությունների արդյունքում այդ նյութերի ձեռքբերումից անմիջապես հետո նամակը ուղարկվելու է։ Դա կարող է լինել ցանկացած պահի»։ Թե որքա՞ն կտեւի այդ գործընթացը՝ հասկանալի չէ։ Լուսինե ԲԱՐՍԵՂՅԱՆ
Կարդացեք նաև
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
