«Կրիմինալ կյանքը անհամեմատ ավելի զարգացած է Գյումրիում եւ Վանաձորում: Դրսեւորումները մենք ոչ մեկ անգամ ենք տեսել: Հատկապես, երբ Գյումրիի նախկին քաղաքապետն ինքն էլ առնչություն ուներ այդ շրջանակների հետ»,- «Առավոտի» հետ զրույցում այսպիսի կարծիք հայտնեց Միջազգային եւ անվտանգության հարցերի հայկական ինստիտուտի հիմնադիր, քաղաքական վերլուծաբան Ստյոպա Սաֆարյանը:
Նրա խոսքերով՝ «Այժմ էլ նկատելի է, որ հատկապես Գյումրիում քաղաքականությունն ամենաշատն է միախառնված կրիմինալին: Այս կտրվածքով, իհարկե, տենդենցները մտահոգիչ են: Եթե մի երկրում օրը ցերեկով օրենքով գողերի հավաք է տեղի ունենում, աննախադեպ է լինում, պաշտոնական մարմինները չեն հերքում, որ դա տեղի է ունեցել, այլ ասում են՝ կներեք, մենք առաջնորդվել ենք Սահմանադրությամբ եւ չենք սահմանափակել նրանց ազատ տեղաշարժի իրավունքը, եթե պատկան մարմինների խոսնակներն ասում են՝ ավելի լավ է օրենքով գողեր հավաքվեն, քան հոմոսեքսուալները, դուք ի՞նչ եք սպասում: Այսպիսի մթնոլորտում արդյոք գողական, քրեական կյանքը ծաղկուն չի՞ լինելու: Իհարկե՝ լինելու է»:
Հ. ՋԵԲԵՋՅԱՆ
«Առավոտ» օրաթերթ
21.01.2015
