Եվրոպական միության (ԵՄ) և Հայաստանի Հանրապետության միջև համագործակցության խորհրդի տասնհինգերորդ նիստը տեղի ունեցավ ս.թ. հունվարի 20-ին: Կողմերը հաստատեցին իրենց պատրաստակամությունը երկուստեք ընդլայնել և խորացնել հարաբերությունները բոլոր ուղղություններում, որոնք չեն հակասում Հայաստանի կողմից ստանձնած նոր միջազգային պարտավորություններին:
Համագործակցության խորհուրը քննարկեց Հայաստանում իրականացվող սոցիալ-քաղաքական բարեփոխումների դինամիկան: ԵՄ-ն ընդունեց ի գիտություն բարեփոխումների իրականացման գործում ձեռք բերված առաջընթացը, միաժամանակ խրախուսելով Հայաստանին ավելի մեծ թափ հաղորդել առանձին ուղղություններում իրականացվող բարեփոխումներին՝ մասնավորապես առանձնացնելով ժողովրդավարությունն և օրենքի գերակայությունը, հակակոռուպցիոն բարեփոխումները, մարդու իրավունքներն ու հիմնարար ազատությունները, սահմանադրական և դատաիրավական բարեփոխումները: Հատկապես կարևորվեց ընտրական համակարգի բարեփոխումների, մամուլի ազատության և քաղաքացիական հասարակության դերի բարձրացման անհրաժեշտությունը:
Կողմերն ամփոփեցին ԵՄ-Հայաստան հետագա հարաբերությունների հավանական սահմաններն ու իրավական հիմքերը: Երկուստեք քննարկվեցին երկկողմ հարաբերությունների այն հավանական ուղղությունները, որոնք չեն հակասի Հայաստանի մասնակցությանը Եվրասիական տնտեսական միության ձևաչափին և անդրադարձ կատարվեց ԵՄ-Հայաստան հավանական պայմանագրային հարաբերությունների իրավական շրջանակին:
Համագործակցության խորհուրդը ողջունեց «Շարժունակության գործընկերության» իրականացման լավ առաջընթացը: ԵՄ-ն վերստին հաստատեց իր հաստատակամությունը նպաստելու քաղաքացիների շարժունակության ընդլայնմանը՝ ապահով և լավ կառավարվող միջավայրում, ինչը հանդիսանում է Արևելյան գործընկերության առանցքային նպատակներից մեկը: Կողմերը ողջունեցին «Մուտքի արտոնագրերի դյուրացման և ռեադմիսիայի» համաձայնագրերը, որոնք ուժի մեջ մտան Համագործակցության խորհրդի վերջին նիստից հետո, և ընդգծեցին դրանց լավ իրականացումը:
Կարդացեք նաև
ԵՄ-ն հաստատեց, որ կշարունակի աջակցել երկրի բարեփոխումներին ուղղված Հայաստանի ջանքերին՝ ներառյալ «Մուտքի արտոնագրերի դյուրացման» և «Ռեադմիսիայի» համաձայնագրերի արդյունավետ իրականացմանը, և կոչ արեց Հայաստանին լավագույն օգտագործել ԵՄ-ն կողմից մինչ այժմ տրամադրված աջակցությունը: 2014-2017 թվականների համար այն կկազմի 140-170 միլիոն եվրոյի հատկացում, որը միտված է մասնավոր հատվածի զարգացմանը, պետական վարչարարության և դատական ոլորտի զարգացմանը:
ԵՄ-ն և Հայաստանը նաև անդրադարձան Արևելյան գործընկերության համատեքստում ստանձնած կողմերի գործողությունները անցյալ տարվա ընթացում: Կողմերն ընդգծեցին համատեղ արդյունավետ քայլերի կարևորությունը Ռիգայում կայանալիք Արևելյան գործընկերության գագաթաժողովին ընդառաջ՝ վկայակոչելով Արևելյան Գործընկերության ճանապարհային քարտեզում ներառված նպատակները գործիքներն ու գործողությունները:
Համագործակցության խորհուրդը քննարկեց տարածաշրջանային հարցեր և Լեռնային Ղարաբաղի հակամարտության կարգավորման հեռանկարները: Վերջինի առնչությամբ ԵՄ-ն վերստին հաստատեց ստատուս քվոյի անընդունելիությունն ու ընդգծեց, որ հակամարտության արագ խաղաղ հանգուցալուծումը մնում է առաջնահերթություն: ԵՄ-ն կրկին հաստատեց իր պատրաստակամությանը աջակցելու խաղաղապահ գործողությունների իրականացմանն ու աջակցելու հակամարտությունից տուժած տարածքների վերականգնմանն ու վերակառուցմանը, հաշտության կնքումից հետո: Կողմերը երկուստեք վերահաստատեցին իրենց պատրաստակամությունը աջակցելու ԵԱՀԿ Մինսկի խմբի համանախագահների աշխատանքներին: Անդրադառնալով անցյալ տարվա աննախադեպ լարվածությանը ԵՄ-ն ընդգծեց, որ անվտանգությունը շփման գծում և Հայաստանի և Ադրբեջանի միջև միջազգային սահմանի ողջ երկայնքով շարունակում է մնալ լուրջ մտահոգությունների առիթ: ԵՄ-ն կոչ արեց երկու կողմերին հարգել հրադադարի ռեժիմը, ներդնել զսպվածություն և արագացնել խաղաղության հաստատմանն ուղղված ջանքերը:
Եվրոպական միության պատվիրակության կազմում էին ԵՄ Խորհրդի նախագահությունը ներկայացնող Լատվիայի արտաքին գործերի նախարար Էդգարս Ռինկևիչը, Եվրոպական միության արտաքին հարաբերությունների և անվտանգության հանձնաժողովի բարձր ներկայացուցիչ Ֆեդերիկա Մոգերինին և Եվրոպական հանձնաժողովի Եվրոպական հարևանության քաղաքականության և ընդլայնման բանակցությունների հարցերով հանձնակատար Յոհանես Հանը: Հայաստանյան պատվիրակությունը գլխավորում էր ՀՀ արտաքին գործերի նախարար Էդվարդ Նալբանդյանը:
