ՍԻՄ կուսակցությունը, քննարկելով Գյումրիի սպանդը, եկել է այն եզրակացության, որ Գյումրիում բախումները կազմակերպել են սադրիչ, արեւմտյան շահերի սպասարկող շրջանակները: Ըստ ՍԻՄ-ի, հենց նրանք են փորձել կազմակերպել անկարգություններ, հարձակումներ ռուսական ռազմաբազայի մոտ:
ՍԻՄ-ը հայտարարություն է տարածել, որ Հայաստանում «մայդանային» տեխնոլոգիան են փորձում կիրառել՝ արտասահմանից ֆինանսավորվող որոշ ԶԼՄ-ների , հ/կ-ների, համացանցում գործող վարձու խմբերի միջոցով: Ուստի ԶԼՄ-ների մասին օրենքում պետք է փոփոխություններ կատարելու առաջարկով հանդես գալ, քննարկումներ կազմակերպել, ԱԺ-ում բարձրացնել Հայաստանում հ/կ-ների աշխատանքների ու ֆինանսական աղբյուրների թափանցիկության վերաբերյալ հարցը եւ առաջարկել պատասխանատվության ենթարկել ԶԼՄ-ներում ու համացանցում ազգամիջյան թշնամանք սերմանողներին:
Այս առնչությամբ Aravot.am-ի հետ զրույցում ՀԱԿ խմբակցության պատգամավոր Լյուդմիլա Սարգսյանը չհամաձայնեց Հայկ Բաբուխանյանի այդ մտադրության հետ. «Ես չեմ կարծում, որ պետք է ամեն դեպքում այդ չափով հ/կ-ները վերահսկել՝ օրենքի ուժով: Դրա համար մենք ունենք հատուկ ծառայություններ, որոնք կարող են զբաղվել դրանով: Այդ դեպքում ինչո՞ւ են հարկատուների հաշվին այդքան մարդ աշխատում Ազգային անվտանգությունում, եթե նրանք չեն կարող որեւիցե մի երկրի շպիոնական ցանցն այստեղ բացահայտել: Կարծում եմ, դա նրանց գործն է, եւ օրենքի ուժով պետք չի հ/կ-ներին դնել ճնշումների տակ՝ հատկապես, որ մենք չենք կարող բոլոր հ/կ-ների մասին նման կարծիք արտահայտել: Այդտեղ թացը չորի հետ խառնվելու է: Վերջին հաշվով ոչ մեկը դեռ չի ապացուցել, որ հ/կ-ները կարող են նման հնարավորություններ ստեղծել հետախուզական, շպիոնական ցանցի համար: Դա միայն ենթադրություն է, ապացուցված չի: Դրա համար կա ԱԱԾ, թող բարի լինեն զբաղվեն»:
Կարդացեք նաև
Հռիփսիմե ՋԵԲԵՋՅԱՆ
