«Ֆինանսական բուրգի գործով» նախորդ դատական նիստին տուժող Արտակ Գալստյանի ներկայացուցիչը հայտնել էր, թե բերման ենթարկվելիք իր վստահորդը գտնվում է Եվրոպայում՝ Փարիզում:
Այսօր այս նույն ներկայացուցիչը հայտնեց, թե իր վստահորդները՝ Արտակ Գալստյանն ու նրա կինը՝ Վեներան երկու ամիս է գտնվում են Ղարաբաղում: Նրանք երեկ զանգել են իրեն, հայտնել, թե այսօր գալու են Աբովյան՝ թաղման, խնդրել են հետաձգել դատական նիստը:
Դատավորը չդիմացավ ՝ասելով, թե Գալստյանների ներկայացուցիչը նախորդ նիստին այլ բան էր ասում, թե նրանք Ֆրանսիայում են. «Հարգելի ներկայացուցիչ, Ղարաբաղը Եվրոպա չէ»:
Ոստիկանության Քանաքեռի բաժնից պաշտոնական գրություն էր ստացվել Կենտրոն եւ Նորք-Մարաշ դատարան, համաձայն որի՝ այն հասցեում, որտեղ իբր բնակվել է Արտակ Գալստյանը, նման մարդ չի ապրել, չի բնակվում նաեւ հիմա:
Կարդացեք նաև
Մեկ այլ գրությամբ էլ պարզվեց, թե Վեներա Գալստյանը երկու շաբաթ է, ինչ գտնվում է Ղարաբաղում:
Այս հակասական տեղեկատվության պայմաններում հարկ եղավ հետաձգել Արթուր Անդրեասյանի նկատմամբ հարուցված քրեական գործով դատական նիստը:
Ըստ ամբաստանյալի մոր, որդին դատարան էր բերվել ցավազրկվելով, նա ստանում է բուժում, բայց ոչ լիովին:
«Ըստ հանրաճանաչ պրոֆեսոր Ֆանարջյանի, որդիս կստանա կանոնավոր հետազոտություն եւ բուժում միայն ստացիոնար պայմաններում, որն արհամարհվում է մինչեւ հիմա»,-ասում է մայրը՝ Փառանձեմ Հակոբյանը:
Դատական նիստը նշանակվեց հունվարի 26-ին:
