Թե ինչու Հայաստանը դրական պատկերով չի երեւում միջազգային հանրությանը, Երեւանի մամուլի ակումբի նախագահ Բորիս Նավասարդյանը մի շարք պատճառներ է տեսնում:
Առաջինը՝ այս տարեսկզբին օրենքով գողերի հավաքը Հայաստանում:
«Անկախ նրանից, թե կար այդ հարցով արձագանք միջազգային կենտրոններից, թե՝ ոչ, ակնհայտ է, որ տարբեր պետությունների ղեկավարներ ստացել են այդ տեղեկատվությունը եւ որոշ չափով նկատի ունեցել: Մեր պաշտոնական արձագանքը միակն էր՝ եթե նրանք հետախուզության մեջ չեն, նրանց նկատմամբ չկա դատավճիռ, ժողովրդավարական Հայաստանում ազատ տեղաշարժի իրավունք ունեն: Իսկ ինչո՞ւ են գողերը գալիս Հայաստան, գալիս են հանգստանալո՞ւ, Նոր տարվա, Սուրբ ծննդյան տոներ նշելո՞ւ, թե՞ այլ նպատակով: Եթե այդ հավաքն իրոք տեղի է ունեցել, ապա պարզ է, որ հանցագործությունների նախապատրաստման նպատակով է կատարվել: Նրանք հավաքվում են, որ կազմակերպեն իրենց հանցավոր հետագա գործողությունը: Ո՞ւր էին իրավապահների կանխարգելիչ գործողությունները»,- այսօր «Տեսակետ» ակումբում ասաց Բորիս Նավասարդյանը:
Նրա խոսքով, հաջորդը՝ Գյումրիում տեղի ունեցած սպանության վերաբերյալ ՀՀ իշխանությունների պահվածքն էր.« Անկախ նրանից, թե ինչ հակասություններ կան հայ-ռուսական համաձայնագրում բազայի կարգավիճակի ու Ռուսաստանի սահմանադրության հետ կապված, հարց է առաջանում՝ ինչու Հայաստանի կողմից պաշտոնական պահանջ, առաջարկ Ռուսաստանին չի եղել, որ այդ քննությունն ու դատավարությունը իրականացնեն հայ իրավապահները, եղել է միայն գլխավոր դատախազի խոստումը, որ կխոսի այդ հարցով ռուս գործընկերոջ հետ: Չենք ստացել համապատասխան արձագանք Ռուսաստանից»:
Կարդացեք նաև
Նա նշեց նաեւ ԵՏՄ համաձայնագիրը, որով անորոշ է մնում, թե Ղարաբաղում ի վերջո անցակետ լինելո՞ւ է, թե՞՝ ոչ.«Արձանագրված հստակ պայմանավորվածություն չունենք, նշանակում է ստորագրել ենք միջազգային կարեւոր փաստաթուղթ՝ առանց հասկանալու դրա հետեւանքները»:
Արփինե ՍԻՄՈՆՅԱՆ
