Երեկ երեկոյան դիմակավորված անձինք Երեւանի Կողբացի փողոցի վրա հարձակվել են քաղաքացիական ակտիվիստ Վիլեն Գաբրիելյանի վրա եւ դաժան ծեծի ենթարկել:
«Ժառանգություն» կուսակցությունը խստորեն դատապարտում է ՀՀ քաղաքացիների նկատմամբ կատարվող այսօրինակ ահաբեկչական գործողությունները եւ.
– հաշվի առնելով Վիլեն Գաբրիելյանի քաղաքական-քաղաքացիական ակտիվ գործունեությունը, նրա սուր քննադատությունը իշխանությունների նկատմամբ,
– նկատի ունենալով, որ վերջին շրջանում շղթայական շարունակականությամբ ծեծի են ենթարկվում քաղաքացիական եւ քաղաքական ու ռազմական գործիչները,
Կարդացեք նաև
– հաստատելով, որ մինչ օրս վերոշարադրյալ եւ նախկինում կատարված ոչ մի նմանատիպ դեպքի բացահայտման նախադեպ չունենք,
համարում ենք, որ կատարվածները իշխանությունների կողմից ուղղակի կամ անուղղակի հովանավորվող հաշվեհարդար են այն քաղաքացիների հանդեպ, ովքեր իրենց բողոքի ձայնն են բարձրացնում ընդդեմ երկրում տիրող անօրինականությունների եւ ամենաթողության:
«Ժառանգություն» կուսակցությունն իր զորակցությունն է հայտնում Վիլեն Գաբրիելյանին եւ արդարության համար պայքարի ելած բոլոր քաղաքացիներին` կոչ անելով աննկուն եւ միասնական լինել ապօրինի իշխանությունների դեմ պայքարում:
«Ժառանգություն» կուսակցության վարչություն
