Միակ թեկնածուն հանրապետական է
Վայք քաղաքում այսօր քաղաքապետ են ընտրում. քաղաքացիներն ընտրության առանձնապես լայն հնարավորություն էլ չունեն. Այստեղ քաղաքապետի ընդամենը մեկ թեկնածու է՝ Հանրապետական կուսակցության կողմից առաջադրված եւ նույն կուսակցության անդամ Արագած Սաղաթելյանը: Նա, ինչպես Կենտրոնական ընտրական հանձնաժողովի կայքէջում է գրված՝ ՋՕԸ գործադիր տնօրենն է: Վայքում՝ 39 ընտրատարածքում Սաղաթելյանը մնաց քաղաքապետի միակ թեկնածուն, երբ անկուսակցական, «Հայաստանի էլեկտրական ցանցերի» «Արաքս» մասնաճյուղի ավագ վարպետ Ալեքսան Սիմոնյանը հրաժարվեց մասնակցել քաղաքապետի «մրցույթին». Վերջինս ինչպես ինքնաառաջադրվել էր, այնպես էլ ինքնաբացարկ ներկայացրեց:
Վայոց Ձորի Վայք քաղաքում ընտրություններն այս պահի դրությամբ անցնում են խաղաղ, առանց որեւէ միջադեպերի: Այս մասին Aravot.am-ի հետ զրույցում ասացին ընտրատեղամասերի անդամներն ու 39 ընտրատարածքի ընտրական հանձնաժողովի անդամ Կարինե Հարությունյանը: Ընտրատարածքի 3-րդ տեղամասի հանձնաժողովի նախագահ Իշխան Զաքարյանը, որը Հայ ազգային կոնգրեսի անդամ է, ասաց. «Թեթեւ գալիս, գնում են, կուտակումներ չեն լինում»:
«Ժառանգության» կուսակցության մարզային պատասխանատու Նարինե Հարությունյանը, որը նաեւ հետեւում է ընտրություններին, մեզ հետ զրույցում եւս վստահեցրեց, որ ամեն ինչ խաղաղ է, նորմալ, առանց միջադեպերի:
Կարդացեք նաև
Ժամը 14.00-ի դրությամբ, ինչպես վստահեցրեց, Կարինե Հարությունյանը, 1030 վայքեցի է մասնակցել քաղաքապետի ընտրությանը. 39 ընտրատարածքի առաջին տեղամասում ընտրության է մասնակցել 354 ընտրող, 2-րդ տեղամասում՝ 301, իսկ 3-րդում՝ 375, Վայքում երեք ընտրատեղամասեր են: Պաշտոնապես Վայքում կա 5224 ընտրող:
Նշենք, որ ըստ «Ընտրական օրենսգրքի» 143-րդ հոդվածի՝ «Համայնքի ղեկավարի ընտրության արդյունքների ամփոփելը կետի», սահմանված է՝ «Համայնքի ղեկավար է ընտրվում այն թեկնածուն, որին կողմ են քվեարկվել առավել թվով ընտրողներ: Մեկ թեկնածուի քվեարկելու դեպքում, նա ընտրվում է, եթե կողմ է քվեարկել քվեարկության մասնակիցների կեսից ավելին»: Այսինքն, ըստ օրենքի, ընտրությանը մասնակցածների կեսից ավելին պետք է կողմ քվեարկի քաղաքապետի թեկնածու Սաղաթելյանի օգտին, որպեսզի նա, ըստ էության հաղթի ընտրություններում:
Նելլի ԲԱԲԱՅԱՆ
