Իր ֆեյսբուքյան էջում «Ասպարեզ» ակումբի նախագահ Լեւոն Բարսեղյանը մի քանի առաջարկներ է արել՝ Գյումրիում ռուս զինվորականների եւ բնակչության միջեւ բախումներից զերծ մնալու համար: Ներկայացնում ենք նրա գրառումը:
Գյումրվա այսօրվա միջադեպի եւ հրատապ գործողությունների մասին (երկու ռուս զինվորականի հետ վիճաբանություն է եղել Գյումրու Ռիժկովի փողոցում եւ հարթվել է, զինվորականները՝ ասում են խմած են եղել, նրանք արդեն իրենց զորամասում են, «Առավոտ», «Գալա»).
Հարգելի հայրենակիցներ, եւ մանավանդ գյումրեցիներ, իրավիճակը իսկապես լարված է, բոլորս էլ լարված ու զայրացած ենք, շատերը նյարդերը կարող են տեղի տալ, այս կամ այն առիթով կամ պատահական վեճի բռնվել, ինչ-որ մի բան անել, որ ծանր հետեւանքներ ունենա, քան ենթադրվում է:
Հիմա, երբ հանրությանը ցույց տվեց, որ չի նահանջում իր հայրենակիցների շահերի պաշտպանությունից, երբ բողոքը տեղ է հասցված ՀՀ իշխանություններին, իսկ վերջիններս որոշ փոխզիջումով խոստացել են քայլեր կատարել այդ պահանջների կատարման համար եւ սպասողական դրություն է, չափազանց կարեւոր է, որ կամք եւ համառություն դրսեւորենք՝ թույլ չտալու համար որեւէ բան, որ շանս կտա ՀՀ իշխանություններին կամ ՌԴ իշխանություններին (կամ որեւէ այլ մեկին) խափանել պահանջի կատարումը, արդար դատաքննությունը:
Կարդացեք նաև
Բացառված չէ, որ կլինեն դիտավորյալ հրահրումներ հայ-ռուսական ինչ-ինչ բախումների, դրանից բխած հետեւանքներով (պարետային ժամ, արտակարգ դրություն, եւ այլն):
Հաշվի առնելով այս ամենը կոչ եմ անում ՀՀ պետական, մարզային եւ քաղաքային իշխանություններին.
1. Ստեղծել ճգնաժամային կառավարման կենտրոն, շտաբ կամ դրա նման մի բան, ուր հրատապ կերպով հոսի քաղաքից, զորամասերի հարակից տարածքներից, ոստիկանությունից, բժշկական, շտապ օգնության, արտակարգ իրավիճակների ծառայություններից, զորամասերից, էլցանցից, գազի եւ այլ ծառայութնուններից եկող տեղեկատվությունը, անհրաժեշտության դեպքում՝ կայացվեն հրատապ կարգավորիչ որոշումներ եւ այլն:
2. Հրատապ եւ արտակարգ ջանքեր ներդնել, հրավիրել ՌԴ բազայի հրամանատարությանը եւ հորդորել կամ պահանջել առայժմ արգելել իրեն զինվորականներին դուրս գալ զորամասերից եւ անգամ ամենաանմեղ նպատակով շփվել քաղաքացիների հետ, կարծում եմ՝ կհասկանան: Դուրս գալու ծայրահեղ անհրաժեշտության դեպքում հավաստիանալ, որ անզեն են ու բոլոր դեպքերում բոլոր տեղաշարժերի մասին տեղեկացնեն ՀՀ ոստիկանությանը, ապա միայն տեղաշարժվեն ՀՀ տարածքով, թեկուզ քաղաքում մեկ խաչմերուկ:
3. Գյումրու ռուսական սպայական ավանում (8-րդ ավան), խստացված շուրջօրյա ոստիկանական բացահայտ հսկողություն սահմանել բոլոր խաչմերուկներում:
4. Նույն ավանում, մերձակա թաղերում, ռուսական այլ զորամասերի հարակից հատվածներում ապահովել կենսապահովման բոլոր օբյեկտների նորմալ գործունեությունը, որ զինվորներն ու ռուս զինվորականների ընտանիքները կարողանան ազատորեն ու առանց հեռանալու հոգալ իրենց բոլոր կենսական կարիքները (խանութներ, դեղատներ, բենզալցակայաններ եւ այլն):
5. Գյումրիում հնարավորինս շատ տեղերում խուլ թաղամասերում, նրբանցքներում, գիշերները չլուսավորվող հատվածներում ոստիկանական հսկողություն սահմանել, կարծում եմ՝ ոստիկանությունը բավարար միջոցներ ունի: Անհնարինության դեպքում տեղեկացնել հանրությանը, որպեսզի ինքնակազմակերպվեն եւ պարեկային ջոկատներ ստեղծեն:
6. Տեղի ունեցող իրադարձությունների եւ կատարվող աշխատանքների մասին բացատրական աշխատանքներով եւ հաղորդումներով հանդես գալ տեղական հեռուստատեսային եւ ռադիո ալիքներով:
Հանրությանը կոչ եմ անում եւ խնդրում եմ զգոն լինել, համբերատար, սառնասիրտ, ուշադիր լինել բոլոր արտասովոր անցուդարձների, մարդկանց, զինվորականների, ավտոմեքենաների նկատմամբ, բոլոր արտասովոր դեպքերի եւ երեւույթների ու դեպքերի մասին տեղեկացնել միմիանց, վստահելի մարդկանց, իշխանություններին, դուռ-լուսամուտ փակ պահել:
Բոլորն խնդրում եմ սա խուճապի հայտարարության տեղ չդնել, սա կանխարգելիչ տագնապ համարեք, գուցե ռիսկերը գերագնահատում եմ, բայց ավելի լավ է գերագնահատել, քան թերագնահատել:
Համապատասխան ընկերներին խնդրում եմ սա փոխանցել նաեւ Շիրակի մարզպետին եւ Գյումրու քաղաքապետին: Ժուռնալիստների «Ասպարեզ» ակումբի բոլոր ռեսուրսները պատրաստ են ներդրվել՝ եթե պետք կլինի:
Գյումրիում չկա նման իրավիճակ: Չի բավարարվել էն 2 օրով: Մայդան մայդան է խաղում, սիրտը ինքնապաշտպանական ու պարեկային ջոկատ է ուզում: Հավաքում է զայրացած ժողովրդին, ստեղծում վերահսկողությունից դուրս եկող իրավիճակ, հայտարարում որ ինքնաբուխ հավաք է և ամեն մարդ ինքն է պատասխանատու իր վարքի համար ու ինքը գնում կանգնում ոստիկանների կողքին:
Սա ոչ թե իրավիճակը մեղմելու, այլ սրելու առաջարկ է: Հավանաբար ՀՀ-ում որոշ ուժերի, որոնց ներկայացնում եք դուք, ձեռնտու չէ, որ Գյումրիում իրավիճակը կարգավորվում է: Ինչ վերաբերվում է Ոստիկանության գործունեությանը, ապա իրոք որ նրանք անելիքներ ունեն, ձեր նմանների գործունեությունը կանխելու առումով: