Այսօր Aravot.am-ը «Նորավանք» գիտակրթական հիմնադրամի տնօրեն Գագիկ Հարությունյանից հետաքրքրվեց` հավանականություն կա՞, որ Ռուսաստանի Դաշնության գլխավոր դատախազությունը Ավետիսյանների ընտանիքին սպանդի ենթարկած եւ արդեն իր մեղքն ընդունած ռուս դասալիք Վալերի Պերմյակովին կհանձնի հայկական իրավապահ մարմինների դատավարությանը, ինչպես որ պահանջում է հասարակությունը:
«Չեմ կարող ասել, դա իմաստուն քայլ կլիներ, եթե Ռուսաստանն ընդառաջեր այդ պահանջը, ինչը կմեղմեր այս լարվածությունը: Միեւնույն ժամանակ, իմ անձնական կարծիքն եմ ասում, այս հետաքննության փուլում համատեղ շարունակեին աշխատանքը»:
Պարոն Հարությունյանն ասաց, որ որքան կարեւոր է Ռուսաստանը Հայաստանի համար, այնքան էլ Հայաստանն է խիստ կարեւոր Ռուսաստանի համար: «Մենք Ռուսաստանի հարավային սահմանն ենք, եւ այդ իսլամական պետությունները, թուրքիաներն, եւ այլն, եւ այլն, մենք ենք, որ պահում ենք, պատկերացրեք եթե չլինի Հայաստանը, էքստրեմիզմն ինչպիսի տարածում կգտներ ողջ հյուսիսային Կովկասում: Այսինքն, հայկական գործոնն է, Հայաստանն է, որը ոնց որ թե ինչ-որ չափով չեզոքացնում է հյուսիսային Կովկասում էքստրեմիզմը: Այնպես, որ մենք խիստ կարեւոր ենք Ռուսաստանի համար»:
Մանրամասն` տեսանյութում
Կարդացեք նաև
Հարցին էլ` արդյոք Ավետիսյանների ընտանիքի սպանությունը կարո՞ղ է ազդել հայ-ռուսական հարաբերություների վրա, պարոն Հարությունյանը պատասխանեց. «Արդեն ազդել է հասարակական մակարդակով, սա երկար ժամանակ դեռ մնալու է որպես քննարկվող հարց, ինչը բնական է: Անբնական կլիներ, եթե արձագանք չլիներ այդ հանցագործությանը: Միաժամանակ պետք է մտածել հետագայում նման երևույթները կանխելու մասին, մտածել այն հարաբերությունների մասին, որոնք օգտակար են երկու երկրների դաշնակցային հարաբերությունների համար»:
Լրագրողներից մեկի դիտարկմանն էլ, որ վարկած կա, թե Ավետիսյանների ընտանիքի սպանության մեջ ադրբեջանա-թուրքական հետք կա, պարոն Հարությունյանն այսպես պատասխանեց. «Այո, կա նման վարկած, ես չեմ կարող բացառել դա, սակայն որեւէ հիմք էլ չունեմ դա պնդելու: Առանց հետաքննության տվյալների ոչինչ ասել հնարավոր չէ: Դրանք բոլորը վարկածներ են»:
Մանրամասն` տեսանյութում
«Հնչում են հայտարարություններ, թե Գյումրիի ռազմակայանից պետք է դուրս գան ռուսական զորքերը: Նման դեպք 1920-ականներին եղել է, երբ այնտեղից դուրս եկան ռուսական զորքերը, սակայն դրան հետեւեց թուրքական զորքերի մուտքը Գյումրի»,-ասաց պարոն Հարությունյանը, անդրադառնալով հանրության պահանջին` դուրս բերել Գյումրիից ռուսական ռազմաբազան:
Նրա խոսքերով` Թուրքիայի կողմից միջուկային զենքի ստեղծման ծրագրեր կան, ինչպես նաեւ ավելացել է Ադրբեջանում ծայրահեղականների գալու հնարավորությունը, իսկ որպես կանոն գունավոր հեղափոխությունների ժամանակ իշխանության են գալիս ոչ թե ժողովրդավարները, դեմոկրատները, այլ ծայրահեղականները, ինչպես դա եղավ եւ Ուկրաինայում, եւ արաբական աշխարհում:
Պարոն Հարությունյանի խոսքերով`«Սա լուրջ մարտահրավեր է, ուստի մեր դաշինքի ամրապնդումը Ռուսաստանի, ԵՏՄ-ի (Եվրասիական տնտեսական միության) հետ, ուղղակի անհրաժեշտություն էր: Կային կարծիքներ, թե կարելի էր պահպանել հարաբերությունների նախկին ձեւաչափը, բայց դա ընդունելի չէր ԵՏՄ պետությունների կողմից: Սա նշանակում է, որ Հայաստանն առաջին հերթին միջուկային վահանի կարգավիճակ է ձեռք բերում` լինելով ՀԱՊԿ-ի և ԵՏՄ-ի անդամ, որը էապես բարձրացնում է մեր անվտանգության մակարդակը»:
Նելլի ԲԱԲԱՅԱՆ
