«Ինչքան երկար եմ նստում այս դահլիճում, այնքան ավելի շատ եմ տարօրինակ հոտը զգում: Ես չեմ սխալվի, եթե ասեմ, որ այդ հոտը նման է 1937 թվականի հոտին: Կարծես իմ դիմաց նստած է տխրահռչակ ՆԿՎԴ-ի եռյակը, որը կանխավ մտածված վճիռ է կայացնելու իմ և իմ ընկերների նկատմամբ, պիտակավորելու է մեզ»,- այսօր Վերաքննիչ քրեական դատարանում «Ցեղակրոն» կուսակցության նախագահ Շանթ Հարությունյանի ու ընկերների գործով դատական նիստի ժամանակ ասաց Արմեն Հովհաննիսյանը:
Նիստը նախագահող դատավորը հարցրեց, թե ում նկատի ունի եռյակ ասելով:
Արմեն Հովհաննիսյանը մեկնաբանեց, որ ինքը նկատի ունի ամբողջ արդարադատության համակարգը, որի անդամ են նաև իրենք:
Հետո Հովհաննիսյանը իր հայտարարությունը շարունակեց ռուսերենով, անդրադարձավ Գյումրիում տեղի ունեցած ընտանիքի սպանությանը, ինչը առաջացրեց դատավորի վրդովմունքը. նա հրահանգեց դատական նիստերի դահլիճում խոսել միայն հայերենով, ասաց՝ որ իրենք էլ հասկանան:
Կարդացեք նաև
«Ես իրավունք ունեմ խոսել այն լեզուներով, որոնց տիրապետում եմ»,-հակադարձեց ամբաստանյալը և իր ելույթը շարունակեց ռուսերենով:
Դատավորը հորդորեց խոսել, ըստ էության, բողոքի վերաբերյալ, հետո նախազգուշացրեց՝ հակառակ դեպքում կզրկի ձայնի իրավունքից:
Արմեն Հովհաննիսյանն էլ հակառակվեց, ասաց՝ Հայաստանում է:
«Վերաքննիչ դատարանում»,- ուղղեց դատավորը:
«Վերաքննիչ դատարանը Հայաստանում չէ՞, թե՞ 102 –րդ ռուսական ռազմաբազայում է»,- շարունակեց Հովհաննիսյանը եւ վերադարձավ բողոքին.
«Մեզ մեղադրողը հանցագործ, ոչ լեգիտիմ ռեժիմի հրահանգով՝ ինձ ու իմ ընկերներին մեղադրեց մի հանցագործության կատարման մեջ, որի ապացույցներն այդպես էլ չներկայացրեց: Նույն ռեժիմի ցուցմունքով՝ առանց իմ մեղքը ապացուցելու նույն հայտնի զակազ կատարող դատավոր Մարտիրոսյանը ինձ դատապարտեց 2 տարի ազատազրկման: Նման պայմաններում առնվազն ծիծաղելի կլիներ իմ կողմից Վերաքննիչ դատարանից պահանջել արդարադատություն»:
Հիշեցնենք, որ Շանթ Հարությունյանն ու ընկերները բողոքարկում են առաջին ատյանի դատարանի որոշումը:
Արփինե ՍԻՄՈՆՅԱՆ
