«Այն սպանդը, որ եղավ Գյումրիում, դա մարտահրավեր է՝ պետության համար: Մարդիկ բավական զգայուն են, ես ուրախ եմ, որ այսպիսի հասարակություն ունենք: Մարդիկ ոտքի կանգնեցին, սկսեցին պահանջել արդար դատավարություն: Դա կապված է անվտանգության հետ: Ի՞նչ է նշանակում, որ ինչ-որ մի մարդ կարող է դուրս գալ ռազմաբազայից, ոչնչացնել ընտանիք եւ նորից պախկվել ռազմաբազայում: Դա անվտանգության խնդիր է»,- այսօր «Հայացք» ակումբում այսպիսի գնահատական տվեց Գլոբալիզացիայի եւ տարածաշրջանային զարգացման կենտրոնի ղեկավար Ստեփան Գրիգորյանը:
Ըստ նրա, պետական ինստիտուտները՝ դատախազությունն ու ոստիկանությունը պարտավոր էին արագ արձագանքել, պահանջել վերադարձնել հայկական կողմին այդ կասկածյալին, երկրորդը՝ պետք է պահանջեին գործ հարուցել այն մարդկանց դեմ, ովքեր ՀՀ տարածքով որոնումներ էին անում զինված՝ անօրինական ու ովքեր տարան-պահեցին այդ մարդասպան կասկածյալին տարածքում. «Դժգոհությունը մեծ էր, ոստիկանությունը պետք է ստեղծեր խմբեր՝ վերահսկելու Գյումրիում իրավիճակը եւ վերահսկելու բազան, որ չփախցնեն այդ մարդուն բազայից: Ցավոք, ոչ մի այդպիսի քայլ չի արվել»:
Ստեփան Գրիգորյանի խոսքերով՝ երկրորդ կարծիք չի կարող լինել, այդ մարդը պետք է դատվի Հայաստանում:
Նրա գնահատմամբ՝ քրեական հիմք չկա, սա նման է ահաբեկչական ակտի. «Ահաբեկչության համար շատ բնորոշ է դաժանությունը: Այդ ակտերը միշտ ցուցադրական են՝ դաժանություն՝ առանց լոգիկայի: Ինչո՞ւ են կասկածյալին պահում ռազմաբազայում, թող բացեն»:
Կարդացեք նաև
Ստեփան Գրիգորյանը քննադատեց ՀՀ պատկան մարմինների պահվածքը. «Սա այն դեպքը չէր, որ մարդիկ իշխանափոխություն էին ուզում, ծեծում էին: Մարդիկ ասում էին՝ մեզ սպանել են, փոխանցեք գործը համապատասխան մարմիններին, ոստիկանները ծեծում են: Մենք ո՞ր երկրում ենք ապրում: Թող մեր քաղաքական իշխանությունները կապվեն ռուսական քաղաքական իշխանության հետ եւ հարց դնեն, որ այս ղեկավարներին տանեն այստեղից, ինչո՞ւ են պահում կասկածյալին ռազմաբազայում»:
Հարցին՝ այս դեպքը կարո՞ղ է նպաստել, որ ռուս խաղաղապահները գան ՀՀ՝ Ստեփան Գրիգորյանը բացառեց դա. «Ադրբեջանցիները չեն ուզում: Կասկածներ կարող են առաջանալ, թե միտումնավոր է արվում, որ Ռուսաստանը մտցնի, բայց ես ավելի մեծ կասկած ունեմ, որ դա ոչ թե ՌԴ իշխանությունները սարքեցին, այլ ՌԴ-ում տարբեր հոսանքներ: Կան հոսանքներ Ռուսաստանի ներսում, որ իշխանությանը չեն ենթարկվում: Այս տեսանկյունից նայեք: Ոչ մի քրեական հետք չկա: Խմած չէր, նարկոտիկի ազդեցության տակ չէր: Երիտասարդ էր, որը նորմալ տեսք ունի: Այստեղ գաղափարախոսության հետք կա: Սապոգները թողնելը եւ երեխայի հարցը ցույց են տալիս,որ սա ահաբեկչական ակտ է: Ուզում են միգուցե թուլացնել Հայաստանը, հաշվեհարդար տեսնել: Շատ լավ կլինի, եթե պարզվի, որ դա քրեական հիմք ունի: Բայց ես տեսնում եմ, որ դա ոչ մի կապ չունի քրեական հիմքի հետ: Այս ընտանիքը ոչ բիզնես ունի, ոչ մի բան: Սա դասական պահվածք է, երբ կասկածյալին ուզում են փրկել, փախցնել, տանել: Ուզում եք փչացնե՞լ ձեր հարաբերությունները ՌԴ-ի հետ: Զարմացած եմ, որ այսպիսի պրիմիտիվ պահվածք կա պետական մարմինների կողմից»:
Հարցին, եթե ահաբեկչական ակտ է, ինչ-որ մարդիկ չպե՞տք է հայտարարեն այդ մասին՝ Ստեփան Գրիգորյանն ասաց. «Սպասեք, կտեսնեք, կհայտարարեն ինչ-որ խմբավորումներ: Հնարավոր է վտանգ կա, որ հայտարարությունից հետո իրենց գլխավորին կբռնեն, դրա համար առայժմ չեն հայտարարում»:
Հռիփսիմե ՋԵԲԵՋՅԱՆ
