«Ես դատախազության դիմաց չէի էլ հասել, գտնվում էի արդարադատության նախարարության նախկին շենքի դիմաց, մայթով բարձրանում էի վերև, ապօրինի կերպով ինձ զրկեցին ազատությունից ու բռնի կերպով բերեցին ոստիկանության Կենտրոնի բաժին»,-քիչ առաջ Aravot.am-ի հետ զրույցում տեղեկացրեց Armenia Today կայքի համակարգող Արգիշտի Կիվիրյանը:
Նա այժմ գտնվում է ՀՀ ոստիկանության Կենտրոնի բաժնում և տեղեկացրեց, որ իրեն բերման ենթարկել ժամը 17.00-ի սահմաններում, երբ Գյումրիում կատարված հանցագործության առիթով կազմակերպված բողոքի երթին մասնակցելիս մայթով բարձրանում էր դեպի ՀՀ դատախազության շենք:
Խնդրեցինք մանրամասնել, թե ինչպե՞ս են իրեն բերման ենթարկել, նա պատմեց. «Խայտառակ ձևով, թևերս ոլորելով ինձ գցեցին ոստիկանական մեքենա, ծնկներիս մի ոստիկան էր նստել: Ոստիկանության մոտ արդեն պրակտիկա է ձևավորվել մշտապես նստել իմ ծնկերին»: Արգիշտի Կիվիրյանին բերման են ենթարկել ՀՀ վարչական օրենսգրքի 182-րդ հոդվածի հիման վրա՝ ոստիկանի օրինական պահանջը չկատարելու հիմնավորմամբ: Սակայն պարոն Կիվիրյանը մեզ հավաստիացրեց, որ նման պահանջ իրեն չի էլ ներկայացվել:
Կարդացեք նաև
Մեր հարցին՝ ոստիկանական բաժանմունքում ոստիկանները գործում են իրավունքի՞ սահմաններում, պարոն Կիվիրյանը պատասխանեց, թե արդեն ոստիկանական բաժանմունք իրեն բերելը օրենքի խախտում էր, հետևաբար խոսել օրինապահությունից անիմաստ է: Այժմ Արգիշտի Կիվիրյանի փաստաբանները գտնվում են ոստիկանական բաժանմունքում: Նա նաև տեղեկացրեց, որ իր հետ բերման են ենթարկվել ևս երկու հոգի՝ Տիգրան Խզմալյանը և մեկ անձ ևս, որի անունը դեռ չի ճշտել:
Գնահատելով կատարվածը՝ պարոն Կիվիրյանն ասաց. «Գնահատականն այն է, որ ուզում են ամեն կերպ ճնշել ՀՀ-ում բողոք իրականացնող քաղաքացիներին: Այստեղ հստակ երևաց ոստիկանության իրական դեմքը: Իրենք անընդունակ են բռնել իրական հանցագործներին և մասնագիտացել են միայն բողոքի ակցիա իրականացնող քաղաքացիներին ճնշելու գործում»:
Տաթև ՀԱՐՈՒԹՅՈՒՆՅԱՆ
