Հայոց ցեղասպանության 100-րդ տարելիցի կապակցությամբ Գերմանիայում գերմաներենով լույս կտեսնի Եղեռնի զոհ դարձած 11 հայ մեծանուն գրողների՝ Դանիել Վարուժանի, Սիամանթոյի, Ռուբեն Սևակի և այլոց ստեղծագործությունների ընտրանին:
Անթոլոգիան կտպագրվի 500 օրինակով, որից բաժին կհանվի նաև գրադարաններին:
Այս մասին այսօր լրագրողների հետ հանդիպման ժամանակ ասաց Հայաստանի գրողների միության նախագահ Էդվարդ Միլիտոնյանը՝ հավելելով, որ արդեն հստակեցված են գրքի շնորհանդեսի օրն ու վայրը. այն հանրությանը կներկայացվի մայիսի 10-ին Գերմանիայի Մագդեբուրգ քաղաքում:
«Մեր մեծ գրողներն արժանի են աշխարհի տարբեր լեզուներով թարգմանվելու և տպագրվելու: Ընթերցողները, գրական աշխարհը պիտի տեսնեն, թե ինչպիսի մեծություններ են զոհ գնացել այդ նախճիրին: Հարյուր տարի գրեթե ոչինչ չի արվել, և մարդիկ ոչ միայն Ցեղասպանության զոհ գնացած գրողների ստեղծագործությունները չգիտեն, այլև նույնիսկ նրանց անունները»,- ասում է Է. Միլիտոնյանը:
Կարդացեք նաև
Հայաստանի գրողների միության նախագահն ասում է, որ Ցեղասպանության զոհ գնացած գրողների ստեղծագործությունները ցանկանում են տպագրել նաև ռուսերեն, ֆրանսերեն և անգլերեն:
Սիրանուշ ՀԱՅՐԱՊԵՏՅԱՆ
